કાઠમંડુ, નવી દિલ્હી, 21 ઓગસ્ટ (હિ.સ.). નેપાળના વડાપ્રધાન બાલેન્દ્ર શાહે સર્વોચ્ચ અદાલતને જવાબ આપતા કહ્યું છે કે, ભ્રષ્ટાચાર અને ગેરકાયદેસર સંપત્તિ છુપાવવાની વૃત્તિને ફક્ત ભ્રષ્ટાચાર વિરોધી બ્યુરોના માધ્યમથી ખતમ કરવું શક્ય નથી. સરકાર દ્વારા ગઠિત સંપત્તિ તપાસ આયોગને રદ કરવાની માંગને લઈને દાખલ કરાયેલી રિટ પર લેખિત જવાબ આપતા વડાપ્રધાન શાહે કહ્યું કે, તપાસ આયોગ અને બ્યુરોના કાર્યો અલગ-અલગ છે.

વડાપ્રધાનના જવાબમાં કહેવામાં આવ્યું છે કે, “કોઈપણ પદાધિકારીની સંપત્તિની તપાસ કરીને કેસ ચલાવવા માટે બંધારણ દ્વારા અધિકૃત બંધારણીય સંસ્થા અખ્તિયાર દુરુપયોગ અનુસંધાન આયોગ છે. પરંતુ દેશભરમાં લાંબા સમય સુધી સત્તામાં રહેલા લગભગ તમામ રાજકીય પદાધિકારીઓ અને ઉચ્ચ પદસ્થ કર્મચારીઓની સંપત્તિનું સંગ્રહ, તપાસ અને અનુસંધાન કરવું અખ્તિયાર માટે શક્ય જણાતું નથી.”

તેમણે કહ્યું કે, દેશમાં ભ્રષ્ટાચાર, ગેરકાયદેસર રીતે અઢળક સંપત્તિ કમાવવા અને આવી સંપત્તિ છુપાવનારા જૂથોના વિકાસની સ્થિતિ સર્જાઈ છે. વડાપ્રધાને કહ્યું કે આવા જૂથોને રાજ્ય દ્વારા શોધી કાઢીને તેમને દંડિત ન કરવા અંગે જનતામાં જે આશંકા છે, તેને દૂર કરવા માટે પણ સંપત્તિ તપાસ આયોગ આવશ્યક છે.

પૂર્વ ન્યાયાધીશ રાજેન્દ્ર ભંડારીની અધ્યક્ષતામાં ગઠિત આ આયોગમાં તત્કાલીન પુનરાવેદન અદાલતના પૂર્વ મુખ્ય ન્યાયાધીશ પુરુષોત્તમ પરાજુલી, ઉચ્ચ અદાલતના પૂર્વ ન્યાયાધીશ ચંડીરાજ ઢકાલ, પૂર્વ પોલીસ નાયબ મહાનિરીક્ષક ગણેશ કેસી અને સનદી હિસાબનીશ પ્રકાશ લમસાલ સભ્યો છે.

આ આયોગ વિરુદ્ધ દાખલ કરાયેલી રિટ પર સર્વોચ્ચ અદાલતના ન્યાયાધીશ ટેકપ્રસાદ ઢુંગાના અને શ્રીકાંત પૌડેલની સંયુક્ત પીઠે વચગાળાનો આદેશ જારી કરતા મામલાને પૂર્ણ પીઠ સમક્ષ રજૂ કરવાનો આદેશ આપ્યો હતો. જોકે, પીઠના આદેશ અનુસાર પૂર્ણ પીઠમાં મામલો રજૂ થાય તે પહેલા જ મુખ્ય ન્યાયાધીશ ડો. મનોજકુમાર શર્માએ તેને બંધારણીય પીઠ સમક્ષ રજૂ કરવાનો વહીવટી નિર્ણય લીધો.

હિન્દુસ્થાન સમાચાર / પંકજ દાસ / મુકુંદ

હિન્દુસ્થાન સમાચાર / ડો.હિતેશ એન.વ્યાસ