નવી દિલ્હી, 24 ઓગસ્ટ (હિ.સ.) આંતરરાષ્ટ્રીય ક્રિકેટ પરિષદ (આઈસીસી) ના અધ્યક્ષ જય શાહે, દિલ્હી અને ડિસ્ટ્રિક્ટ ક્રિકેટ એસોસિએશન (ડીડીસીએ) ના અધ્યક્ષ રોહન જેટલી સાથે મુલાકાત કરી. તેમણે ડીડીસીએના પૂર્વ પ્રમુખ સ્વર્ગસ્થ અરુણ જેટલીને તેમની 7મી પુણ્યતિથિની પૂર્વ સંધ્યાએ શ્રદ્ધાંજલિ અર્પણ કરી.

જય શાહે સ્વર્ગસ્થ અરુણ જેટલીના કાયમી વારસાનું સન્માન કર્યું અને તેમને દૂરંદેશી નેતા, રાજકારણી અને ભારતીય ક્રિકેટ પ્રશાસન માટે એક સાચી પ્રેરણા ગણાવ્યા. બંને નેતાઓએ દિલ્હી ક્રિકેટમાં જેટલીના પરિવર્તનકારી યોગદાન અને રાજધાનીમાં આધુનિક ક્રિકેટના માળખાનો પાયો નાખવામાં તેમની મહત્વપૂર્ણ ભૂમિકા વિશે વાત કરી.

આ સમયે દિલ્હી પ્રીમિયર લીગ-2026 (ડીપીએલ) નું આયોજન નવી દિલ્હીના અરુણ જેટલી સ્ટેડિયમમાં જ કરવામાં આવી રહ્યું છે. આ ટુર્નામેન્ટ અરુણ જેટલીના વિઝનને સાચી શ્રદ્ધાંજલિ છે, જેમાં પાયાના સ્તરની પ્રતિભાને આગળ વધારવામાં આવે છે અને દિલ્હીના યુવા ક્રિકેટરોને એક મોટા મંચ પર પોતાની કુશળતા બતાવવા માટે એક ઉત્તમ પ્લેટફોર્મ પૂરું પાડવામાં આવે છે.

આ પ્રસંગે ડીડીસીએ અધ્યક્ષ રોહન જેટલીએ જય શાહના આ ઉષ્માભર્યા કાર્ય બદલ હૃદયપૂર્વક આભાર વ્યક્ત કર્યો અને આ ક્ષેત્રમાં ક્રિકેટના વિકાસ માટે સ્વર્ગસ્થ અરુણ જેટલીના સિદ્ધાંતો અને વિઝનને જાળવી રાખવાની ડીડીસીએની પ્રતિબદ્ધતાને ફરીથી દોહરાવી.

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / માધવી વ્યાસ