નવી દિલ્હી, 11 સપ્ટેમ્બર (હિ.સ.) કેન્દ્રીય મહિલા અને બાળ વિકાસ મંત્રાલય હેઠળ કેન્દ્રીય દત્તક ગ્રહણ સંસાધન પ્રાધિકરણ (કારા) ના સીઈઓ ભાવના સક્સેનાએ જણાવ્યું કે, બાળકોને ગેરકાયદેસર દત્તક ગ્રહણથી બચાવવા માટે સમગ્ર બાળ સંરક્ષણ તંત્રમાં જાગૃતિ અને સતર્કતા અત્યંત જરૂરી છે. દરેક બાળકને સુરક્ષિત બાળપણ, સુરક્ષિત ભવિષ્ય અને કાયદાનું સંરક્ષણ મળવું જોઈએ. ભાવના સક્સેનાએ ગેરકાયદેસર રીતે બાળકોને દત્તક લેવા પર રોક લગાવવા અને બાળકોના અધિકારો તેમજ સુરક્ષાને મજબૂત કરવા માટે ગુરુવારે સાંજે દિલ્હી સચિવાલયમાં આયોજિત દત્તક ગ્રહણ જાગૃતિ કાર્યશાળામાં આ વાત કહી. તેમણે કહ્યું કે, દત્તક ગ્રહણની પ્રક્રિયામાં કોઈપણ પ્રકારનો શોર્ટકટ ન હોઈ શકે અને ઈચ્છુક દત્તક માતા-પિતાએ નિર્ધારિત કાનૂની પ્રક્રિયાનું જ પાલન કરવું જોઈએ.

કાર્યશાળામાં બાળ સંરક્ષણ અને દત્તક ગ્રહણ વ્યવસ્થા સાથે સંકળાયેલા આશરે 200 સહભાગીઓએ ભાગ લીધો. આમાં આરોગ્ય અને પોલીસ વિભાગના અધિકારીઓ, બાળ કલ્યાણ સમિતિઓ, જિલ્લા બાળ સંરક્ષણ એકમો, દત્તક ગ્રહણ એજન્સીઓ, હોસ્પિટલ અને નર્સિંગ હોમ સાથે સંકળાયેલા પ્રતિનિધિઓ, એએનએમ અને આંગણવાડી કાર્યકરો સહિત વિવિધ હિતધારકો સામેલ હતા.

કાર્યક્રમમાં કારા ના સીઈઓ ભાવના સક્સેના, દિલ્હી સરકારના મહિલા અને બાળ વિકાસ વિભાગના સચિવ રશ્મિ સિંહ, દિલ્હી પોલીસના ડીસીપી નેહા યાદવ, વધારાના પોલીસ કમિશનર મોનિકા ભારદ્વાજ, દિલ્હી બાળ અધિકાર સંરક્ષણ આયોગના અધ્યક્ષ ઓ.પી. વ્યાસ અને આઉટર નોર્થ જિલ્લાના સીએમઓ ડો. અનિલ યાદવ સહિત અનેક વરિષ્ઠ અધિકારીઓ હાજર રહ્યા.

દિલ્હી સરકારના સચિવ રશ્મિ સિંહે જણાવ્યું કે, આરોગ્ય અને પોલીસ વિભાગથી લઈને એએનએમ, આંગણવાડી કાર્યકરો, જિલ્લા બાળ સંરક્ષણ એકમો અને બાળ કલ્યાણ સમિતિઓ સુધી તમામ સંબંધિત પક્ષોની ભાગીદારી વ્યાપક જાગૃતિની દિશામાં એક મહત્વપૂર્ણ પગલું છે. સામૂહિક પ્રયાસો બાળકોના સુરક્ષિત અને સંરક્ષિત બાળપણ માટે સંસ્થાકીય પ્રતિબદ્ધતાને મજબૂત કરે છે.

કાર્યશાળામાં ગેરકાયદેસર દત્તક ગ્રહણની રોકથામ અને તેના નિવારણના ઉપાયો પર ત્રણ તકનીકી સત્રોનું આયોજન કરવામાં આવ્યું. પહેલા સત્રમાં ગેરકાયદેસર દત્તક ગ્રહણના ઉભરતા વલણો, પડકારો અને રાજ્ય તેમજ રાષ્ટ્રીય સ્તરે કાર્યવાહી પર ચર્ચા થઈ. બીજા સત્રમાં હોસ્પિટલો, નર્સિંગ હોમ, આરોગ્ય વ્યવસ્થા, પોલીસ અને ન્યાયપાલિકાની ભૂમિકા પર વિચાર કરવામાં આવ્યો. ત્રીજા સત્રમાં કાનૂની પાસાઓ પર વિચાર કરવામાં આવ્યો.

જાગૃતિ અભિયાન હેઠળ કાર્યશાળામાં કાનૂની દત્તક ગ્રહણ પર આધારિત એક ફિલ્મ પણ રજૂ કરવામાં આવી. ફિલ્મ દ્વારા અધિકૃત દત્તક ગ્રહણ પ્રક્રિયાનું પાલન કરવાના મહત્વ અને ગેરકાયદેસર દત્તક ગ્રહણ સાથે સંકળાયેલા જોખમોને સરળ અને અસરકારક રીતે સમજાવવાનો પ્રયાસ કરવામાં આવ્યો.

આ ઉપરાંત ગેરકાયદેસર દત્તક ગ્રહણ વિરુદ્ધ જમીની સ્તરે કરવામાં આવેલા પ્રયાસો અને વાસ્તવિક અનુભવોને પણ શેર કરવામાં આવ્યા. કાર્યશાળાના અંતે ઇન્ટરેક્ટિવ ક્વિઝનું આયોજન થયું, જેમાં સહભાગીઓએ કાનૂની જોગવાઈઓ અને પોતાની જવાબદારીઓ સંબંધિત માહિતીને ચકાસી.

હિન્દુસ્થાન સમાચાર / વિજયાલક્ષ્મી / પવન કુમાર

હિન્દુસ્થાન સમાચાર / માધવી વ્યાસ