નવી દિલ્હી, 13 સપ્ટેમ્બર (હિ.સ.) સંયુક્ત રાષ્ટ્ર મહાસચિવ એન્ટોનિયો ગુટેરેસએ, રવિવારે 18મા બ્રિક્સ શિખર સંમેલનમાં જણાવ્યું કે, આજની આર્થિક, જનસાંખ્યિકીય અને ભૂ-રાજકીય વાસ્તવિકતાઓ 1945 જેવી નથી. વૈશ્વિક સંસ્થાઓના માળખામાં સમય અનુસાર બદલાવ થવો જોઈએ. તેમણે સંયુક્ત રાષ્ટ્ર સુરક્ષા પરિષદ અને બ્રેટન વુડ્સ વ્યવસ્થામાં સુધારાની જરૂરિયાત જણાવી.

ગુટેરેસએ કહ્યું કે, દુનિયા ઝડપથી બહુધ્રુવીય વ્યવસ્થા તરફ આગળ વધી રહી છે. બહુધ્રુવીયતા વૈશ્વિક વ્યવસ્થા અને સંસ્થાઓમાં સંતુલન અને સમાનતા લાવવામાં મદદ કરી શકે છે. તેમણે કહ્યું કે બ્રિક્સ સંમેલનની થીમ ને અનુરૂપ દુનિયાને લચીલાપણું, નવીનતા, સહયોગ અને ટકાઉ વિકાસ પર આગળ વધવું પડશે. આ સર્વસમાવેશી વૈશ્વિક વિકાસ માટે જરૂરી છે.

ગુટેરેસએ સર્વસમાવેશી વૈશ્વિક વિકાસ માટે ચાર મુખ્ય મુદ્દાઓ પર ભાર મૂક્યો. આમાં પહેલો નાણાકીય સુધાર છે. આ અંતર્ગત વિકાસશીલ દેશો માટે વધુ નાણાકીય સંસાધનો, દેવા રાહત અને વૈશ્વિક નાણાકીય સંસ્થાઓમાં તેમની વધુ ભાગીદારીની જરૂર છે. બીજો ટેકનોલોજી છે. તેમણે કૃત્રિમ બુદ્ધિમત્તાની અસમાનતા ઓછી કરવા અને વિકાસશીલ દેશોને કમ્પ્યુટિંગ ક્ષમતા, ડેટા તથા કૌશલ્ય ઉપલબ્ધ કરાવવા પર ભાર મૂક્યો. ત્રીજો જળવાયુ ન્યાય છે. આમાં નવીનીકરણીય ઊર્જાને પ્રોત્સાહન આપવું, ઉત્સર્જન ઘટાડવું અને વિકાસશીલ દેશોને જળવાયુ ભંડોળ ઉપલબ્ધ કરાવવું શામેલ છે. ચોથો શાંતિ છે. આ અંતર્ગત ગાઝા, યુક્રેન, સુદાન અને અન્ય સંઘર્ષોનું શાંતિપૂર્ણ સમાધાન તથા સંયુક્ત રાષ્ટ્ર ચાર્ટર અને આંતરરાષ્ટ્રીય કાયદાનું સન્માન જરૂરી છે.

હિન્દુસ્થાન સમાચાર / અનૂપ શર્મા / પવન કુમાર

હિન્દુસ્થાન સમાચાર / માધવી વ્યાસ