નવી દિલ્હી, 15 સપ્ટેમ્બર (હિ.સ.). કોંગ્રેસ અધ્યક્ષ મલ્લિકાર્જુન ખડગેએ આરોપ લગાવ્યો કે, 'યુપીઆઈ પર કોઈ શુલ્ક નહીં'ની વ્યવસ્થા બદલીને બે હજાર રૂપિયા સુધીના યુપીઆઈ વ્યવહારોને શુલ્ક મુક્ત અને તેનાથી ઉપર શુલ્ક લગાવવાની તૈયારી કરવામાં આવી રહી છે. તેમણે સરકાર પાસેથી પાંચ હજાર રૂપિયાના વ્યવહાર પર 25 રૂપિયા અને 10 હજાર રૂપિયાના વ્યવહાર પર 50 રૂપિયા સુધીના સંભવિત શુલ્કના સમાચારો પર સ્પષ્ટતા માંગી છે.

ખડગેએ એક્સ પોસ્ટમાં જણાવ્યું કે, મોંઘવારીના કારણે આમ આદમીની જેબ પહેલેથી જ ખાલી છે. જથ્થાબંધ મોંઘવારી આશરે 10 ટકા છે અને આવા સમયે યુપીઆઈ વ્યવહારો પર શુલ્ક લગાવવાની વ્યવસ્થા જનતાની બચત પર વધારાનો બોજ નાખશે. તેમણે નોટબંધીનો ઉલ્લેખ કરતા કહ્યું કે, આશરે 10 વર્ષ પહેલાં નોટબંધી દ્વારા અર્થતંત્રને આંચકો આપવામાં આવ્યો હતો. જ્યારે તેના પરિણામો પર સવાલો ઉઠ્યા ત્યારે સરકારે તેને ડિજિટલ ચુકવણી અને રોકડ રહિત અર્થતંત્રને પ્રોત્સાહન આપવાની દિશામાં લેવાયેલું પગલું ગણાવ્યું હતું.

ખડગેએ કહ્યું કે, નાણાં મંત્રીએ તાજેતરમાં સંસદમાં કહ્યું હતું કે, યુપીઆઈ પર કોઈ કર કે શુલ્ક લગાવવામાં આવશે નહીં. તેમ છતાં તેમણે કેટલાક મીડિયા અહેવાલોનો હવાલો આપતા પૂછ્યું કે, શું પાંચ હજાર રૂપિયાના વ્યવહાર પર 25 રૂપિયા અને 10 હજાર રૂપિયાના વ્યવહાર પર 50 રૂપિયા સુધીની સંભવિત વસૂલાતના સમાચારો સાચા છે.

તેમણે વેપારી વળતર દરનો ઉલ્લેખ કરતા કહ્યું કે, વેપારી પર પડતો વધારાનો બોજ આખરે વસ્તુઓ અને સેવાઓની કિંમતો દ્વારા સામાન્ય ગ્રાહક પાસેથી જ વસૂલી શકાય છે. મોંઘવારીથી પરેશાન જનતાને રાહત આપવાને બદલે, સરકાર તેના ખિસ્સા પર વધારાનો બોજ નાખવાના નવા રસ્તા શોધી રહી છે.

હિન્દુસ્થાન સમાચાર / પ્રશાંત શેખર / પવન કુમાર

હિન્દુસ્થાન સમાચાર / ડો.હિતેશ એન.વ્યાસ