મહેસાણા, 2 ઓક્ટોબર (હિ.સ.)
આજ રોજ મહેસાણા જિલ્લાના ઊંઝા તાલુકાને “સ્વચ્છતા હી સેવા-2025” અંતર્ગત શ્રેષ્ઠ કામગીરી બદલ પ્રથમ સ્થાન પ્રાપ્ત થયું છે. આ પ્રસંગે જિલ્લા ગ્રામ વિકાસ એજન્સીના માનનીય નિયામકશ્રીએ તાલુકાને પ્રમાણપત્ર એનાયત કર્યું હતું.
સ્વચ્છતા અભિયાન અંતર્ગત ઊંઝા તાલુકામાં ગામ સ્તરે કચરા વ્યવસ્થાપન, જાહેર સ્થળોની સફાઈ, ગ્રામજનોમાં જાગૃતિ કાર્યક્રમો, પ્લાસ્ટિક મુક્તિ માટેના પ્રયાસો અને સ્વચ્છ પાણી તેમજ સ્વચ્છ પર્યાવરણ પ્રત્યેના અનોખા યોગદાન માટે આ પુરસ્કાર મળ્યો છે. તાલુકાના સરપંચો, ગ્રામ પંચાયત સભ્યો, મહિલા મંડળો અને યુવા મંડળો સહિત અનેક સ્વયંસેવકોએ મળીને ગામોને સ્વચ્છ અને હરિયાળ બનાવવામાં સહકાર આપ્યો છે.
આ સન્માન માત્ર એક સિદ્ધિ નથી, પરંતુ સમગ્ર તાલુકાના લોકો માટે ગૌરવની ક્ષણ છે. આ અભિયાનથી પ્રેરણા લઈને ભવિષ્યમાં પણ સ્વચ્છતા પ્રત્યે સમર્પિત રહી ગામડાઓને વિકાસની નવી ઊંચાઈએ પહોંચાડવાનો સંકલ્પ વ્યક્ત કરવામાં આવ્યો છે.
ઊંઝા તાલુકાની આ સિદ્ધિ સમગ્ર મહેસાણા જિલ્લામાં અન્ય તાલુકાઓ માટે પ્રેરણાદાયી બની છે અને “સ્વચ્છતા હી સેવા” ના હેતુને આગળ વધારવામાં મહત્વપૂર્ણ પગલું સાબિત થશે.
---------------
હિન્દુસ્થાન સમાચાર / RINKU AMITKUMAR THAKOR
