અમરેલી, 6 ઓક્ટોબર (હિ.સ.): સાવરકુંડલા માનવમંદિર આશ્રમ ખાતે દર વર્ષની જેમ આ વર્ષે પણ શરદ પૂર્ણિમાના પાવન પર્વ નિમિત્તે ભવ્ય રાસોત્સવનું આયોજન કરવામાં આવ્યું છે.

આશ્રમની મનોરોગી દીકરીઓ આ પ્રસંગે આનંદભેર રાસ રમી પોતાના જીવનમાં આનંદ અને ઉત્સાહનો રંગ ભરી દેશે. કાર્યક્રમનું અધ્યક્ષસ્થાન ભારતીય ખેડૂત ખાતરના પ્રતિષ્ઠિત ઉદ્યોગ સમૂહ IFFCOના ચેરમેન શ્રી દિલીપભાઈ સંઘાણી કરશે.

આ રાસોત્સવમાં આશ્રમની દીકરીઓ સાથે સાવરકુંડલા શહેર અને આસપાસના વિસ્તારોમાંથી ખેલૈયાઓ પણ જોડાશે. બધા ખેલૈયાઓ પરંપરાગત વસ્ત્રોમાં રાસ-ગરબા રમશે, જે સમગ્ર વાતાવરણને રંગીન અને આનંદમય બનાવશે. આશ્રમના સંચાલકો દ્વારા જણાવવામાં આવ્યું છે કે આ કાર્યક્રમનો હેતુ મનોરોગી દીકરીઓમાં આત્મવિશ્વાસ વધારવાનો અને સમાજમાં સકારાત્મક સંદેશ પહોંચાડવાનો છે.

શરદ પૂર્ણિમાની ચાંદનીમાં યોજાનાર આ રાસોત્સવમાં ભક્તિ સંગીત, ગરબા તાળ અને આનંદના રંગોનું અનોખું સમન્વય જોવા મળશે. સાવરકુંડલાના નાગરિકો પણ આ ભવ્ય કાર્યક્રમમાં મોટી સંખ્યામાં ઉપસ્થિત રહી દીકરીઓના ઉત્સાહને વધાવશે.

---------------

હિન્દુસ્થાન સમાચાર / Gondaliya Abhishek Nandrambhai