અમરેલી, 13 નવેમ્બર (હિ.સ.) : અમરેલી જિલ્લા ચૂંટણી અધિકારી દ્વારા મતદારયાદી ખાસ સઘન સુધારણા કાર્યક્રમ – 2025ને સફળ બનાવવા માટે રાજકીય પક્ષોના પ્રતિનિધિઓ સાથે મહત્વપૂર્ણ બેઠક યોજાઈ હતી. આ બેઠક જિલ્લા કલેક્ટર અને જિલ્લા ચૂંટણી અધિકારીની અધ્યક્ષતામાં જિલ્લા સચિવાલય ખાતે યોજાઈ હતી. બેઠક દરમિયાન ચૂંટણી અધિકારીએ ઉપસ્થિત તમામ રાજકીય પક્ષોના પ્રતિનિધિઓને કાર્યક્રમની સમગ્ર પ્રક્રિયા વિશે વિગતવાર માહિતી આપી હતી. તેમણે જણાવ્યું કે મતદારયાદી સુધારણા કાર્યક્રમનો મુખ્ય હેતુ છે — દરેક યોગ્ય નાગરિકને મતાધિકાર મળવો, મતદારયાદીમાં રહેલી ભૂલોનો સુધાર કરવો અને નવા મતદારોના નામ ઉમેરવા.

આ અવસરે અધિકારીએ જણાવ્યું કે 18 વર્ષ પૂર્ણ કરનારા યુવાનોને મતદાર તરીકે નોંધાવવા માટે ખાસ ધ્યાન આપવામાં આવશે. સાથે જ મતદારયાદીમાંથી મૃત અથવા સ્થળાંતર કરેલ વ્યક્તિઓના નામ કાઢવાની પ્રક્રિયા પણ હાથ ધરવામાં આવશે. રાજકીય પક્ષોના પ્રતિનિધિઓને આ કાર્યક્રમમાં સક્રિય સહયોગ આપવા વિનંતી કરવામાં આવી હતી.

ચૂંટણી અધિકારીએ જણાવ્યું કે આ ખાસ સઘન સુધારણા કાર્યક્રમ અંતર્ગત દરેક મતદારને પોતાના વિગતો ચકાસવા માટે ઑનલાઇન અને ઑફલાઇન બંને વિકલ્પ ઉપલબ્ધ રહેશે. Form-6, Form-7 અને Form-8 મારફતે નવા મતદારોના ઉમેરા, નામ કાપવાની તેમજ સુધારણા કરવાની પ્રક્રિયા સરળ બનાવી છે.

બેઠકમાં ઉપસ્થિત તમામ રાજકીય પક્ષોના પ્રતિનિધિઓએ ચૂંટણી વિભાગના આ પ્રયાસની પ્રશંસા કરી અને સહયોગ આપવાની પ્રતિબદ્ધતા વ્યક્ત કરી. અંતે જિલ્લા ચૂંટણી અધિકારીએ તમામને અપીલ કરી કે દરેક નાગરિક પોતાનું નામ મતદારયાદીમાં ચોક્કસપણે તપાસે અને લોકશાહી પ્રક્રિયામાં સક્રિય ભાગ ભજવે. આ બેઠકથી લોકશાહી મજબૂત કરવાની દિશામાં અમરેલી જિલ્લામાં એક સકારાત્મક સંદેશો ફેલાયો છે.

---------------

હિન્દુસ્થાન સમાચાર / Gondaliya Abhishek Nandrambhai