અમદાવાદ, 17 ડિસેમ્બર (હિ.સ.) : છેલ્લા બે ત્રણ દિવસથી ગુજરાતમાં હાલ મિશ્ર વાતાવરણનો અનુભવ થઈ રહ્યો છે, ગુજરાતમાં તાપમાન 2થી 3 ડિગ્રી વધશે, ઠંડીનું જોર ઘટશે. નલિયા 10.4 ડિગ્રી સાથે રાજ્યનું સૌથી ઠંડું શહેર રહ્યું હતું.

હવામાન વિભાગની આગાહી મુજબ આગામી દિવસોમાં ઠંડીના જોરમાં ઘટાડો થવાની શક્યતા છે.

વેસ્ટર્ન ડિસ્ટર્બન્સની અસર અને પૂર્વ દિશા તરફના પવન ફૂંકાવાને કારણે લઘુત્તમ તાપમાનમાં 2થી 3 ડિગ્રી સેલ્સિયસનો વધારો થશે, જેના પરિણામે ઠંડીમાં આંશિક રાહત મળશે. તાજેતરના આંકડા મુજબ, નલિયા 10.4 ડિગ્રી સેલ્સિયસ સાથે રાજ્યનું સૌથી ઠંડું શહેર રહ્યું હતું, જ્યારે વડોદરામાં 12.2 ડિગ્રી અને અમદાવાદમાં 14.7 ડિગ્રી લઘુત્તમ તાપમાન નોંધાયું હતું. રાજ્યના અન્ય શહેરોમાં પણ તાપમાનનો પારો ઊંચકાય અને ઠડીમાં ઘટાડો થાય તેવી શક્યતા સેવાઈ રહી છે.

હિન્દુસ્થાન સમાચાર / હર્ષ શાહ