મહેસાણા, 23 ડિસેમ્બર (હિ.સ.) : મહેસાણા જિલ્લાના નંદાસણ નજીક આવેલા લક્ષ્મીપુરા (નંદા) ગામની પ્રાથમિક શાળામાં રાષ્ટ્રીય ગણિત દિવસની ઉત્સાહ અને આનંદભરી રીતે ઉજવણી કરવામાં આવી. આ કાર્યક્રમનું આયોજન મહાન ગણિતજ્ઞ શ્રીનિવાસ રામાનુજનની જન્મજયંતિના સ્મરણાર્થે કરવામાં આવ્યું હતું. કાર્યક્રમની શરૂઆતમાં શિક્ષિકાઓ દ્વારા વિદ્યાર્થીઓને રાષ્ટ્રીય ગણિત દિવસનું મહત્વ તથા શ્રીનિવાસ રામાનુજનના જીવન અને ગણિત ક્ષેત્રે આપેલા યોગદાન વિશે માહિતી આપવામાં આવી. ત્યારબાદ દૈનિક જીવનમાં ગણિતનું મહત્વ કેવી રીતે ઉપયોગી બને છે તે સરળ અને રસપ્રદ રીતે સમજાવવામાં આવ્યું.

વિદ્યાર્થીઓ દ્વારા ગણિત આધારિત રમતો, કોયડાઓ, પ્રશ્નોત્તરી સ્પર્ધાઓ અને વિવિધ રસપ્રદ પ્રવૃત્તિઓ રજૂ કરવામાં આવી, જેના કારણે સમગ્ર શાળામાં ઉત્સાહપૂર્ણ માહોલ સર્જાયો. ખાસ કરીને વિદ્યાર્થીઓએ પોતે તૈયાર કરેલા ગણિતીય મોડલ રજૂ કરીને તેની સમજ આપી, જેનાથી તેમની તાર્કિક વિચારશક્તિ, ગણિતીય સમજ અને સર્જનાત્મકતા પ્રગટ થઈ.

આ કાર્યક્રમમાં શાળાના તમામ વિદ્યાર્થીઓએ ઉત્સાહપૂર્વક ભાગ લીધો. શિક્ષિકાઓ દ્વારા વિદ્યાર્થીઓને સતત પ્રોત્સાહન અને માર્ગદર્શન આપવામાં આવ્યું. ‘કલા અને શિક્ષણમાં ગણિત અને સર્જનાત્મકતા’ જેવી રાષ્ટ્રીય ગણિત દિવસની થીમને અનુરૂપ આ ઉજવણી જ્ઞાનવર્ધક, પ્રેરણાદાયક અને આનંદદાયક રહી. અંતે વિદ્યાર્થીઓને પ્રોત્સાહક ઇનામ આપી કાર્યક્રમનું સફળતાપૂર્વક સમાપન કરવામાં આવ્યું.

---------------

હિન્દુસ્થાન સમાચાર / RINKU AMITKUMAR THAKOR