રાજકોટ/ગાંધીનગર, 26 ડિસેમ્બર (હિ.સ.) : રાજ્યપાલ આચાર્ય દેવવ્રતએ તેમની રાજકોટ જિલ્લાની મુલાકાત દરમિયાન ગોંડલ તાલુકાના લુણીવાવ ગામ ખાતે વૃક્ષારોપણ કરીને ગામલોકોને વધુ વૃક્ષો ઉછેરવા પ્રેરણા આપી હતી. આ સાથે તેમણે સ્થાનિક અગ્રણીઓ અને વરિષ્ઠ અધિકારીઓ સાથે શેરીની સફાઈ હાથ ધરીને સ્વચ્છતા અભિયાન આગળ વધારવા ગ્રામજનોને અનુરોધ કર્યો હતો.
રાજ્યપાલ આચાર્ય દેવવ્રત રાજકોટ ખાતે સૌરાષ્ટ્ર યુનિવર્સિટીના પદવીદાન સમારોહમાં ઉપસ્થિત રહ્યા બાદ સાંજે લુણીવાવ ગામ ખાતે પધાર્યા ત્યારે તેઓને ગાર્ડ ઓફ ઓનર આપવામાં આવ્યું હતું.
એ પછી રાજ્યપાલએ અહીં પ્રાથમિક શાળા ખાતે એક પેડ માઁ કે નામ અભિયાન અંતર્ગત વડના છોડનું રોપણ કર્યું હતું. આ તકે તેમણે પોતાના સરળ સ્વભાવ અનુસાર શાળાના બાળકો તથા શિક્ષકો સાથે સંવાદ કર્યો હતો. તેમણે બાળકોને વૃક્ષોનું મહત્વ સમજાવ્યું હતું. આ સાથે આજે વાવેલા વૃક્ષોને રોજ પાણી પીવડાવીને ઉછેરવા અને મોટા થાય ત્યાં સુધી તેમનું ધ્યાન રાખવા બાળકોને પ્રેરણા આપી હતી. પ્રાથમિક શાળા ખાતે મહાનુભાવોના હસ્તે વડ સાથે અર્જુન સાદડ, કરંજ, પુત્રંજીવા, લીમડો, ઊમરો, પીપર, પીપળો જેવા વૃક્ષો રોપવામાં આવ્યા હતા.
આ તકે રાજ્યપાલએ ‘સ્વચ્છ ભારત અભિયાન’ને વેગ આપતા રામજી મંદિરથી લઈને સુખનાથ મહાદેવ મંદિર સુધીની શેરીની સઘન સફાઈ કરી હતી.
આ અવસરે રાજ્યપાલએ ગ્રામજનો સાથે સંવાદ કરીને ગામને સ્વચ્છ અને આદર્શ ગ્રામ બનાવવાનો સંકલ્પ લેવા લોકોને પ્રેરણા આપી હતી. તેમણે સ્વચ્છતામાં પ્રભુતાનો વાસ હોવાનું કહીને સ્વચ્છતાના કાર્યને ખૂબ જ મહત્વનું ગણાવ્યું હતું.
રાજ્યપાલએ કહ્યું હતું કે, જન્મ દિવસ, લગ્નની વર્ષગાંઠ સહિતના પ્રસંગે સમાજ માટે કંઈક કરવાની ભાવના સાથે વૃક્ષો વાવવા જોઈએ. વૃક્ષ વાવ્યા પછી તમારે ત્રણ વર્ષ કાળજી લેવાની છે. એ પછી વૃક્ષ આખી જિંદગી તમારી કાળજી લેશે. ઓક્સિજન, લાકડા, છાંયડો વૃક્ષ આખી જિંદગી વિનામૂલ્યે આપશે.
આ તકે રાજ્યપાલના હસ્તે ગામના સફાઈ કામદારોનું સન્માન કરવામાં આવ્યું હતું.
---------------
હિન્દુસ્થાન સમાચાર / અભિષેક બારડ
26 Dec 2025
