ભાવનગર,3 ડિસેમ્બર (હિ.સ.) ભાવનગર શહેરના કાળુભા રોડ પર આવેલી બિલ્ડિંગમાં ભીષણ આગ લાગતાં અફરાતફરીનો માહોલ સર્જાયો છે. સમીપ નામના કોમ્પલેક્સમાં આગ લાગતા દોડધામ મચી છે. આ કોમ્પલેક્સમાં ડઝનથી વધુ હોસ્પિટલો આવેલી છે. જ્યારે આગને પગલે દોડધામ મચી જવા પામી છે. બિલ્ડીંગમાં આગ લાગતા ફાયર બ્રિગેડે મેજેર કોલ જાહેર કર્યો છે. સાથે જ ફાયરની ટીમ ઘટનાસ્થળે દોડી આવી છે અને બિલ્ડિંગમાં ફસાયેલા દર્દીઓને રેસ્કયૂ કરી બહાર કાઢવાની કામગીરી હાથ ધરવામાં આવી રહી છે.

સમીપ કોમ્પ્લેક્સમાં કોમ્પલેક્સમાં 3-4 હોસ્પિટલ આવેલી છે. જેમાં બાળકોની હોસ્પિટલનો પણ સમાવેશ થાય છે. જેને કારણે દોડાદોડી થઈ ગઈ હતી.ફાયરબ્રિગેડને કોલ મળતાં જ તાત્કાલિક ઘટનાસ્થળે પહોંચી ગયું હતું. સાથે જ બાળકોની હોસ્પિટલમાં પહેલા માળે કાચ તોડી સીડી મૂકી બાળકોનું રેસ્ક્યૂ કરાયું હતું.

સ્ટેન્ડિંગ કમિટીના ચેરમેન રાજુ રાબડીયાએ જણાવ્યું કે કાળુભા રોડ સમીપ કોમ્પલેક્સમાં સવારે આગ લાગતા ફાયરની ટીમ તાત્કાલિક પહોંચી હતી. બાળકોનું રેસ્કયૂ કરાયું હતું. કોઈ જાનહાનિ થઈ નથી. પાર્કિંગમાં આગ લાગ્યાનું જાણવા મળ્યું છે.ઘટના બાદ કોમ્પલેક્સને ખાલી કરાવાયું છે.

5 ફાયર ફાઇટર-50થી વધુ કર્મચારીઓ આગ બુઝાવવાની કામગીરીમાં લાગ્યા: ફાયર ઓફિસર

ફાયર ઓફિસર પ્રદ્યુમ્નસિંહે જણાવ્યું હતું કે 19-20 માણસનું રેસ્કયૂ કરાયું છે. કાળુભા રોડ પર સમીપ કોમ્પ્લેક્સમાં આગ લાગી હતી. આ કોમ્પ્લેક્સમાં મોટેભાગે હોસ્પિટલો છે. કોમ્પ્લેક્સના બ્રેઝમેન્ટમાં આગ લાગી હતી ને પછી આખી બિલ્ડિંગમાં આગ પ્રસરી હતી. 5 ફાયર ફાઇટર અને 50થી વધુ કર્મચારીઓ આગ બુઝાવવાની કામગીરીમાં લાગ્યા હતા.

ભાવનગરના કમિશનર એન.વી.મીનાએ જણાવ્યું કે કોમ્પલેક્સના ગ્રાઉન્ડ ફ્લોર પર કચરામાં આગ લાગી હતી. એના ધુમાડાથી હોસ્પિટલના દર્દીઓને અસર થતાં તેમને અન્ય જગ્યાએ ખસેડાયા હતા. આગને લઈ કોઈ જાનહાનિ થઈ નથી. ક્યાં કારણસર આગ લાગી હતી તેની યોગ્ય તપાસ કરી પગલાં લઈશું.

હિન્દુસ્થાન સમાચાર / હર્ષ શાહ