જૂનાગઢ 10 જુલાઈ (હિ.સ.) સામાજિક ન્યાય અને અધિકારિતા વિભાગ, રાજ્ય સરકારશ્રી દ્વારા અનુસૂચિત જાતિના ઘર વિહોણા લોકો માટે ડો.આંબેડકર આવાસ યોજના અંતર્ગત રૂ.૧,૭૦.૦૦૦ ની સહાય મળવાપાત્ર બને છે. આ સહાય અંતર્ગત લાભ મેળવવા ઇચ્છુક જૂનાગઢ જિલ્લાના ગ્રામ્ય વિસ્તારના નાગરિકોએ esamajkalyan.gov.in આ વેબસાઈટ ઉપર જઈને ઓનલાઇન અરજી કરવાની રહેશે. તેમજ અરજી સાથે જોડવાના થતા જરૂરી આધાર પુરાવાની યાદી આ વેબસાઈટ માંથી જ મળી રહેશે. આ અંગે વધુ માહિતી મેળવવા માટે જે- તે તાલુકા પંચાયત ખાતે તાલુકા સમાજ કલ્યાણ નિરીક્ષક અનુસૂચિત જાતિ કલ્યાણ અને સમાજ કલ્યાણ શાખા, જિલ્લા પંચાયત- જૂનાગઢ ખાતે સંપર્ક સાધી શકાય છે. તેમ જિલ્લા સમાજ કલ્યાણ અધિકારીશ્રી, જિલ્લા પંચાયત, જૂનાગઢની યાદીમાં જણાવવામાં આવ્યું છે.

---------------

હિન્દુસ્થાન સમાચાર / ભરતસિંહ જાદવ