પાટણ, 11 જુલાઈ (હિ.સ.)પાટણ જિલ્લાના સમી તાલુકાના નાની ચંદુર ગામમાં શૈક્ષણિક સુવિધાઓનો વિસ્તાર થવાની છે. મુખ્યમંત્રી ભૂપેન્દ્રભાઈ પટેલે સરકારી માધ્યમિક શાળાના બાંધકામ માટે 8094 ચોરસ મીટર જમીન ફાળવવાની મંજૂરી આપી છે. આ જમીન પર શાળાનું નવા માળખાં સાથે બાંધકામ અને રમત-ગમતનું મેદાન પણ બનાવવામાં આવશે.

આ નવી શાળામાં કમ્પ્યુટર લેબ, વિજ્ઞાન પ્રયોગશાળા અને લાઇબ્રેરી જેવી આધુનિક સુવિધાઓ રહેશે. “રમશે ગુજરાત – જીતશે ગુજરાત” અભિયાન હેઠળ રમત-ગમતના મેદાનને પણ વિકસાવવામાં આવશે. આ સર્વાંગી વિકાસથી નાની ચંદુર અને આજુબાજુના ગામોના વિદ્યાર્થીઓને ગુણવત્તાયુક્ત શિક્ષણ સ્થાનિક સ્તરે જ મળી રહેશે.

રાજ્ય સરકાર શિક્ષણના ક્ષેત્રે સતત સક્રિય છે. નવા વર્ગખંડો, સ્માર્ટ ક્લાસરૂમ, શિક્ષકોની ભરતી અને શિષ્યવૃત્તિ યોજનાઓ દ્વારા શિક્ષણની ગુણવત્તા સુધારવાની કામગીરી હાથ ધરાઈ છે. સ્થાનિક લોકોએ આ પગલાંનું હર્ષથી સ્વાગત કર્યું છે.

હિન્દુસ્થાન સમાચાર / પરમાર હાર્દિકકુમાર