ભુજ-કચ્છ, 11 જુલાઈ (હિ.સ.) રાજ્યમાં ચોમાસાની ઋતુમાં સાર્વત્રિક મેઘમહેરની વચ્ચે આ ચોમાસામાં કચ્છ જિલ્લો વરસાદમાં અગ્રેસર રહ્યો છે. દાયકાઓ અગાઉ આ જિલ્લો ચોમાસામાં વરસાદ માટે તડપતો હતો જ્યારે 2020 બાદ કચ્છમાં સૌથી વધુ વરસાદ પડતો થયો છે. ચાલુ ચોમાસામાં એટલે કે 2025માં જુલાઇ માસના મધ્યભાગ સુધી જ કચ્છના મધ્યમસ્તરના મુખ્ય 20 જળાશયમાં 50 ટકાથી વધુ પાણી ભરાઇ ગયું છે. જ્યારે જિલ્લાનો સરેરાશ વરસાદ પણ 57 ટકા નોંધાયો છે.

શિયાળામાં નલિયાનું તાપમાન રાજ્યમાં સૌથી નીચું જતું હોય છે જ્યારે ઉનાળામાં ભુજ શહેરનું તાપમાન સૌથી ઉંચું રહેતું હોય છે ત્યારે ચાલુ ચોમાસામાં આ જિલ્લો સરેરાશ વરસાદમાં આગળ છે અને તેમાં ગાંધીધામ વિસ્તારમાં વધુ વરસાદ પડ્યો છે. આમ કચ્છ જિલ્લો હવે તમામ ઋતુમાં અગ્રેસર બન્યો છે.

ગત વર્ષ કરતાં રાજ્યમાં 14.45 ટકા પાણીનો વધુ સંગ્રહ

રાજ્યની વાત કરીએ તો, સચરાચરા વરસાદની હાલની સ્થિતિએ સરદાર સરોવર સહિત રાજ્યના 207 જળાશયોમાં કુલ સંગ્રહ શક્તિના 54 ટકા જળ સંગ્રહ થયો છે. ગુજરાતની જીવાદોરી સમાન સરદાર સરોવર યોજનામાં હાલમાં કુલ સંગ્રહ શક્તિના 49.42 ટકા પાણીનો જથ્થો ઉપલબ્ધ છે. ગત વર્ષે આ સમયે એટલે કે, તા. 11 જુલાઈ-2024ની સ્થિતિએ રાજ્યના 207 જળાશયોમાં 39.55 ટકા જળ સંગ્રહ હતો તેમ, જળ સંપત્તિ વિભાગ ગાંધીનગરની યાદીમાં જણાવાયું છે. તમામ જળાશયોની ગણતરીએ ગત વર્ષ કરતાં રાજ્યમાં 14.45 ટકા પાણીનો વધુ સંગ્રહ નોંધાયો છે.

હવે કુલ સંગ્રહશક્તિનું 56.76 ટકા પાણી ઉપલબ્ધ

મધ્ય ગુજરાતના 17 જળાશયોમાં સૌથી વધુ 62.83 ટકા જળ સંગ્રહ, સૌરાષ્ટ્રના 141 જળાશયોમાં 62.37 ટકા જળ સંગ્રહ, કચ્છના 20 જળાશયોમાં 56.07 ટકા, દક્ષિણ ગુજરાતના 13 જળાશયોમાં 55.67 ટકા જ્યારે ઉત્તર ગુજરાતના 15 જળાશયોમાં 46.79 ટકા જળ સંગ્રહ ઉપલબ્ધ છે. આમ સરદાર સરોવર સિવાય રાજ્યના 206 જળાશયોમાં કુલ સંગ્રહ શક્તિના 56.76 ટકા પાણીનો જથ્થો સંગ્રહાયલો છે.

વરસાદે ગુજરાતને કર્યું તરબતર

હાલમાં ચોમાસાની ઋતુમાં સૌથી વધુ કચ્છમાં સરેરાશ 57 ટકા, દક્ષિણ ગુજરાતમાં 52.18 ટકા, સૌરાષ્ટ્રમાં 47.01 ટકા, પૂર્વ મધ્યમાં 45.90 ટકા જ્યારે ઉત્તર ગુજરાતમાં 42.08 ટકા સરેરાશ વરસાદ થયો છે. જેના ફળ સ્વરૂપે રાજ્યના 24 જળાશયો 100 ટકાથી વધુ, 54 જળાશયો 70 થી 100 ટકાની વચ્ચે, 44 જળાશયો 50 થી 70 ટકાની વચ્ચે જ્યારે 40 જળાશયો 25 થી 35 ટકાની વચ્ચે ભરાયા છે. જેથી રાજ્યના 38 જળાશયો માટે હાઈ એલર્ટ, 20 જળાશયો એલર્ટ જ્યારે 20 જળાશયો માટે વોર્નિંગ જાહેર કરવામાં આવી છે.

બે રાજ્ય ધોરીમાર્ગ અને એક રાષ્ટ્રીય માર્ગ બંધ

ભારે વરસાદના કારણે રાજ્યમાં હાલની સ્થિતિએ વડોદરા જિલ્લામાં બે સ્ટેટ હાઈવે અને છોટાઉદેપુર તાલુકામાં માત્ર એક નેશનલ હાઈવે સિવાય બાકીના તમામ રોડ રસ્તા ચાલુ છે. આ બંધ રોડ પણ બનતી ત્વરાએ ચાલુ કરાશે.

હિન્દુસ્થાન સમાચાર / BHAVIN K VORA