પાટણ, 29 જુલાઈ (હિ.સ.)પાટણ નજીક આવેલ શ્રી ખેજડીયા વીર દાદાના મંદિર પરિસરમાં પાટણ પ્રજાપતિ સમાજના ઈંટોવાળા પંચ પરિવાર દ્વારા શ્રાવણ સુદ પાંચમે પરંપરાગત ટોપલા ઉજાણી ભક્તિભાવથી ઉજવાઈ હતી. પરિવારમાં વિવિધ કુવાસીઓએ આ પાવન પર્વમાં ઉત્સાહપૂર્વક ભાગ લીધો હતો.

વર્ષોથી ચાલતી પરંપરા અનુસાર કુવાસીઓએ પોતાના ઘરે શ્રદ્ધાભાવથી નૈવેદ્ય જેવી કે ઢુઢણ, લાપસી, રોટલી, ખીર અને અડદ-મગની દાળના વડા તૈયાર કર્યા હતા. ત્યારબાદ ટોપલામાં આ નૈવેદ્ય ગોઠવી પગપાળા યાત્રા કરીને અનુસ્થિત ખેજડીયા વીર દાદાના મંદિર પહોંચ્યા હતા, જ્યાં નૈવેદ્ય અર્પણ કરી સમૂહમાં પ્રાર્થના અને પ્રસાદ ગ્રહણ કરવામાં આવ્યો હતો.

આ પવિત્ર પર્વને યાદગાર બનાવવા ઈંટોવાળા પંચ પરિવારના આગેવાનો, યુવાનો, મંદિરના મહંત, ભક્તો અને ટ્રસ્ટીગણ દ્વારા સુંદર આયોજન કરવામાં આવ્યું હતું. સમગ્ર મંદિર પરિસરમાં મેળા જેવો માહોલ સર્જાયો હતો અને નાના-મોટા સૌએ આનંદ સાથે આ પરંપરાનું સ્મરણિય રીતે પાલન કર્યું હતું.

હિન્દુસ્થાન સમાચાર / પરમાર હાર્દિકકુમાર