પાટણ, 9 જુલાઈ (હિ.સ.)સિદ્ધપુર તાલુકાના લુખાસણ ગામમાં 7 જુલાઈની રાત્રે એક ચોંકાવનારી ઘટના ઘટી હતી, જેમાં ઘરની બહાર સૂઈ રહેલા 60 વર્ષીય વૃદ્ધ જીવાભાઈ દેવીપુજક પર અજાણ્યા શખ્સે તીક્ષ્ણ હથિયાર વડે હુમલો કર્યો હતો. તેઓ રાત્રે લગભગ 8 વાગ્યે તેમની બીમાર બહેનને જોઈ ઘરે પાછા આવ્યા બાદ લોખંડના ખાટલામાં સૂઈ ગયા હતા.

અંદાજે રાત્રે 11:30 વાગ્યે ઘરમાંથી બૂમાબૂમ સાંભળી જીવાભાઈના પુત્ર જીતેન્દ્ર દોડી આવ્યા હતા. તેમણે પિતાને લોહીલુહાણ હાલતમાં જોયા હતા. જીવાભાઈની જમણી આંખ, ગાલ અને હોઠ પર ત્રણ ઊંડા ઘા ઝીંકવામાં આવ્યા હતા. તેમને તાત્કાલિક સિદ્ધપુરની ખાનગી હોસ્પિટલમાં લઈ જવામાં આવ્યા હતા, અને ત્યારબાદ મહેસાણાની લાયન્સ હોસ્પિટલ ખસેડી ઓપરેશન કરવામાં આવ્યું હતું.

જીતેન્દ્રભાઈ, જે અમદાવાદમાં 108 એમ્બ્યુલન્સમાં ડ્રાઈવર તરીકે નોકરી કરે છે, તેમણે અજાણ્યા શખ્સ વિરુદ્ધ પોલીસ ફરિયાદ નોંધાવી છે. હાલ હુમલાનું ચોક્કસ કારણ જાણવા મળ્યું નથી અને હુમલાખોર કોણ છે તે અંગે તપાસ શરૂ કરવામાં આવી છે.

હિન્દુસ્થાન સમાચાર / પરમાર હાર્દિકકુમાર