વડોદરા 2 ઓગસ્ટ (હિ.સ.) આઝાદીનો પર્વ 15 ઓગસ્ટને આવનાર છે, અને વડોદરા શહેર દેશપ્રેમના રંગમાં રંગાઈ ગયું છે. વડોદરા મહાનગરપાલિકા તરફથી શહેરના મુખ્ય સરકારી મકાનો, ઐતિહાસિક સ્મારકો અને મોટા ટ્રાફિક સર્કલ પર ઝગમગતી લાઈટિંગથી શણગાર કરવામાં આવ્યો છે. રાત્રિના સમયે આ લાઇટિંગનો નજારો નાગરિકોના દિલમાં દેશભક્તિની લાગણી વધુ પ્રગટ કરે છે.

સ્વાતંત્ર્ય દિવસની ઉજવણીમાં માત્ર વડોદરા જ નહીં, પરંતુ આસપાસના તાલુકાઓ પણ ઉત્સાહપૂર્વક જોડાયા છે. ખાસ કરીને સાવલી નગરપાલિકા દ્વારા 13 ઓગસ્ટે ભવ્ય તિરંગા યાત્રાનું આયોજન કરવામાં આવ્યું છે. આ યાત્રાને ખાસ બનાવશે વિધાનસભ્ય શ્રી કેતન ઇનામદારની ઉપસ્થિતિ. તિરંગા યાત્રા દરમિયાન નાગરિકો હાથમાં રાષ્ટ્રીય ધ્વજ લઈને, દેશભક્તિના નારા લગાવતા, એકતા અને સૌહાર્દનો સંદેશ આપશે.

નગરપાલિકાએ નાગરિકોને આ તિરંગા યાત્રામાં વધતા વધો જોડાવાનું અનુરોધ કર્યું છે. આ માત્ર એક કાર્યક્રમ નહીં, પરંતુ આપણાં સ્વાતંત્ર્ય સેનાનીઓની યાદમાં અને તેમના ત્યાગને માન આપવા માટેનું એક પ્રતીકાત્મક પગલું છે. યુવા, વૃદ્ધ, સ્ત્રીઓ, બાળકો – સૌએ પોતાના વ્યસ્ત જીવનમાંથી સમય કાઢીને આ મહોત્સવમાં ભાગ લેવો જોઈએ, જેથી આપણી દેશપ્રેમની લાગણી નવી પેઢી સુધી પહોંચે.

શહેરમાં લાગેલી લાઈટિંગ, માર્ગો પર ફરકતો તિરંગો અને લોકોના ચહેરા પર દેખાતો ઉત્સાહ – આ બધું મળીને વડોદરા અને સાવલીને સ્વાતંત્ર્ય દિવસની પૂર્વસંધ્યાએ એક અનોખી ઉજવણીનું કેન્દ્ર બનાવી રહ્યા છે.

હિન્દુસ્થાન સમાચાર / Dhruvik Nandrambhai Gondliya