વડોદરા, 12 ઓગસ્ટ (હિ.સ.): આજ રોજ વડોદરા તાલુકાના પદમલા ગામ ખાતે દીપક ફાઉન્ડેશનના સહયોગથી નિઃશુલ્ક આરોગ્ય તપાસ કેમ્પનું આયોજન કરવામાં આવ્યું હતું. આ કેમ્પમાં ખાસ કરીને ગામના નાગરિકોને પ્રાથમિક તેમજ વિશિષ્ટ આરોગ્ય સેવાઓ પૂરી પાડવાનો હેતુ રાખવામાં આવ્યો હતો. આરોગ્ય ક્ષેત્રે કાર્યરત નિષ્ણાતોની ટીમ દ્વારા વિવિધ પ્રકારની તબીબી તપાસો કરવામાં આવી, જેમાં એક્સ-રે, આરબીએસ (રૅન્ડમ બ્લડ સુગર), NAAT, બ્લડ ટેસ્ટ, બ્લડ પ્રેશર ચકાસણી તેમજ ક્ષયરોગ (ટી.બી.)ની તપાસ સહિતની સેવાઓ આપવામાં આવી હતી.

સ્થાનિક રહીશોએ આ કેમ્પનો ખૂબ લાભ લીધો અને સેકડો લોકોએ પોતાની આરોગ્યની તપાસ કરાવી. દીપક ફાઉન્ડેશનના પ્રતિનિધિઓએ જણાવ્યું કે ગામના લોકો સમયસર પોતાની તબીબી તપાસ કરાવે તે માટે આવા કેમ્પોનું આયોજન સતત કરવામાં આવે છે. આરોગ્ય નિષ્ણાતોએ જણાવ્યું કે વહેલી તકે રોગનું નિદાન થવાથી યોગ્ય સારવાર શરૂ કરી શકાય છે, જે ગંભીર બીમારીઓના જોખમને ઓછું કરે છે.

કેમ્પ દરમિયાન લોકોમાં આરોગ્ય અંગે જાગૃતિ ફેલાવવા માટે માર્ગદર્શન સત્રનું પણ આયોજન કરવામાં આવ્યું હતું, જેમાં શુદ્ધ પાણી પીવું, સ્વચ્છતા જાળવવી, સંતુલિત આહાર લેવો અને નિયમિત વ્યાયામ કરવો જેવી બાબતો પર ભાર મુકાયો હતો. ટી.બી. અને ડાયાબિટીસ જેવા રોગો અંગે ખાસ માહિતી આપી, તેના લક્ષણો અને બચાવના ઉપાયો સમજાવવામાં આવ્યા.

પદમલા ગામના સરપંચ તેમજ ગ્રામજનો દ્વારા દીપક ફાઉન્ડેશન અને તબીબી ટીમનો આભાર માનવામાં આવ્યો. તેમણે જણાવ્યું કે ગામના લોકો માટે આવી સેવા અત્યંત મહત્વપૂર્ણ છે, ખાસ કરીને તે લોકો માટે જેઓ શહેરમાં જઈને તપાસ કરાવવા માટે સક્ષમ નથી. આ પ્રકારના આરોગ્ય કેમ્પો ગામના સર્વાંગી વિકાસ માટે અનિવાર્ય છે.

આ આરોગ્ય કેમ્પ સફળતાપૂર્વક પૂર્ણ થયો અને ભવિષ્યમાં આવા વધુ કેમ્પો યોજવાનો સંકલ્પ લેવાયો.

---------------

હિન્દુસ્થાન સમાચાર / Dhruvik Nandrambhai Gondliya