બોટાદ13 ઓગસ્ટ (હિ.સ.): બોટાદ જિલ્લામાં સંસ્કૃત સપ્તાહ ઉજવણી દરમિયાન કરાયેલા ઉત્તમ આયોજન અને પ્રેરણાદાયી કાર્યક્રમો માટે જિલ્લા શિક્ષણાધિકારીશ્રીને રાજ્ય સ્તરે સન્માનિત કરવામાં આવ્યા. રાજ્ય શિક્ષણ વિભાગ દ્વારા આયોજિત આ સન્માન સમારોહમાં વિવિધ જિલ્લાઓમાંથી પસંદ કરાયેલા અધિકારીઓ અને શિક્ષણકાર્યમાં યોગદાન આપનારા પ્રતિભાશાળી વ્યક્તિઓને પુરસ્કૃત કરવામાં આવ્યા, જેમાં બોટાદના જિલ્લા શિક્ષણાધિકારીનો સમાવેશ થયો.

સંસ્કૃત સપ્તાહ દરમિયાન બોટાદ જિલ્લામાં શાળાઓ, કોલેજો તથા સાંસ્કૃતિક સંસ્થાઓના સહયોગથી ભાષા, સાહિત્ય, કાવ્યપઠન, નાટક, સંવાદ સ્પર્ધાઓ તથા સંસ્કૃત ભાષાના પ્રચાર-પ્રસાર માટે અનેક નવીન પ્રવૃત્તિઓ યોજાઈ હતી. વિદ્યાર્થીઓમાં સંસ્કૃત પ્રત્યે રસ વધે તે માટે અનોખી પહેલો કરવામાં આવી હતી, જેને રાજ્ય સ્તરે પ્રશંસા પ્રાપ્ત થઈ.

રાજ્ય સ્તરે મળેલા આ સન્માનથી બોટાદ જિલ્લાના શિક્ષણ મંડળમાં આનંદનો માહોલ સર્જાયો છે. જિલ્લા શિક્ષણાધિકારીએ આ અવસર પર જણાવ્યું કે, સંસ્કૃત ભાષા ભારતની સંસ્કૃતિ અને પરંપરાનો મૂળ આધાર છે, અને તેનો પ્રચાર-પ્રસાર વધારવો આપણી જવાબદારી છે. સાથે જ, ભવિષ્યમાં પણ આવી ભાષાકીય અને સાંસ્કૃતિક ઉજવણીઓ વધુ ઊર્જા અને નવીનતા સાથે કરવાની પ્રતિબદ્ધતા વ્યક્ત કરી.

---------------

હિન્દુસ્થાન સમાચાર / Gondaliya Abhishek Nandrambhai