ભુજ - કચ્છ, 13 ઓગસ્ટ (હિ.સ.): હર ઘર તિરંગા, હર ઘર સ્વચ્છતા: સ્વતંત્રતા સ્વચ્છતા કે સંગ અભિયાન સાથે રાજ્યમાં હાલમાં ઉત્સાહભેર વિવિધ પ્રકારના કાર્યક્રમોનું આયોજન કરવામાં આવી રહ્યું છે. જેમાં રાષ્ટ્રવાદની ભાવના સાથે 'વંદે માતરમ્' અને 'ભારત માતા કી જય'ના નાદ સાથે કચ્છની ગલીઓ ગુંજી ઉઠી છે.

ભવ્ય તિરંગા યાત્રાએ દેશભક્તિનું વાતાવરણ ઉભું કર્યું.

કચ્છ જિલ્લા કલેક્ટર આનંદ પટેલના માર્ગદર્શન હેઠળ કચ્છમાં સ્વતંત્રતા સપ્તાહની ઉજવણી અંતર્ગત વિવિધ જનજાગૃતિ કાર્યક્રમો યોજાઈ રહ્યા છે. જે અંતર્ગત વિવિધ ગામોમાં અને શાળાઓમાં દેશભક્તિભર્યા વાતાવરણમાં ભવ્ય રીતે તિરંગા યાત્રા યોજાઈ હતી. લૂણી પ્રાથમિક શાળા મુન્દ્રા, જખૌ પ્રાથમિક શાળા, શ્રી સરકારી માધ્યમિક શાળા ગુનેરી, જી.એન. ભદ્રા હાઈસ્કૂલ તેરા, પાટીદાર કન્યા વિદ્યાલય ભુજ, મોડેલ સ્કૂલ- નલિયા અને અબડાસા તથા માધાપર, મિરઝાપર, નારાણપર, નલીયા, કુકમા, વાંઢાય, બિદડા, મંજલ કપુરાશી સહિતના ગામમાં તિરંગા યાત્રા યોજવામાં આવી હતી. નાગરિકો અને શિક્ષકો પણ મોટી સંખ્યામાં જોડાયા.

આ સાથે ખાવડા ખાતે BSFની 85 બટાલિયન અને પોલીસના સંયુક્ત ઉપક્રમે ‘હર ઘર તિરંગા’ સાયકલ રેલી યોજાઇ હતી. આ તિરંગા યાત્રામાં બહોળી સંખ્યામાં નાગરિકો, જિલ્લા, તાલુકા અને ગ્રામ્ય કક્ષાના પદાધિકારીઓ, અધિકારીઓ, શિક્ષકો, વિવિધ કચેરીઓના કર્મયોગીઓ, શાળાના વિદ્યાર્થીઓ, યુવાનો, મહિલાઓ તેમજ નાગરિકો ઉત્સાહભેર જોડાયા હતા.

હિન્દુસ્થાન સમાચાર / BHAVIN KAILASHCHANDRA VORA