બોટાદ, 13 ઓગસ્ટ (હિ.સ.): બોટાદ જિલ્લામાં જિલ્લા કક્ષાએ ત્રિરંગા યાત્રા કાર્યક્રમ ભવ્ય રીતે યોજાયો હતો, જેમાં મોટા પ્રમાણમાં પદાધિકારીઓ, અધિકારીઓ, વિદ્યાર્થીવર્ગ તેમજ સ્થાનિક નાગરિકોએ ઉત્સાહભેર ભાગ લીધો હતો. યાત્રાની શરૂઆત દેશભક્તિના નારા અને ગીતોની ગુંજ વચ્ચે કરવામાં આવી હતી, જેને કારણે સમગ્ર કાર્યક્રમ દેશપ્રેમના રંગમાં રંગાઈ ગયો હતો. યાત્રા દરમિયાન ભાગ લેનારાઓને પીવાના પાણીની સુવિધા, એમ્બ્યુલન્સ સેવા તેમજ ફાયર સેફ્ટી જેવી જરૂરી વ્યવસ્થાઓ સુચારુ રીતે ઉપલબ્ધ કરાવવામાં આવી હતી, જેથી કોઈપણ પ્રકારની આકસ્મિક પરિસ્થિતિમાં તરત સહાય મળી શકે. રસ્તાઓ પર દેશપ્રેમથી સરાબોર વાતાવરણ સર્જાતા નાગરિકો અને બાળકોમાં દેશભક્તિની ભાવના વધુ મજબૂત બની હતી.

આ કાર્યક્રમનું વિશેષ આકર્ષણ ‘ત્રિરંગા સેલ્ફી પોઇન્ટ’ રહ્યું, જ્યાં લોકો ત્રિરંગાની પૃષ્ઠભૂમિ સાથે ફોટો લઈ યાદગાર ક્ષણોને કેદ કરી રહ્યા હતા. સમગ્ર યાત્રા દરમિયાન શાંતિ, વ્યવસ્થા અને ઉત્સાહપૂર્ણ માહોલ જાળવવામાં આવ્યો હતો. અંતે, આયોજકોએ તમામ ભાગ લેનારાઓ અને સહયોગીઓનો આભાર વ્યક્ત કર્યો અને ભવિષ્યમાં પણ આવા રાષ્ટ્રપ્રેમ વધારતા કાર્યક્રમો યોજવાની પ્રતિબદ્ધતા વ્યક્ત કરી.

---------------

હિન્દુસ્થાન સમાચાર / Gondaliya Abhishek Nandrambhai