મહેસાણા, 14 ઓગસ્ટ (હિ.સ.) મહેસાણા જિલ્લા સૈનિક બોર્ડ ખાતે આજે લીગલ એઈડ ક્લિનિકની સ્થાપના કરવામાં આવી. આ ક્લિનિકનો હેતુ પૂર્વ સૈનિકો, તેમના પરિવારજનો તથા સેવા દરમિયાન કાર્યરત સૈનિકોને કાનૂની માર્ગદર્શન અને સહાય સુલભ કરાવવાનો છે.
કાર્યક્રમમાં જિલ્લા સૈનિક કલ્યાણ અધિકારી, કાનૂની વિભાગના પ્રતિનિધિઓ તથા પૂર્વ સૈનિકો ઉપસ્થિત રહ્યા હતા. અધિકારીઓએ જણાવ્યું કે લીગલ એઈડ ક્લિનિક મારફતે મિલ્કત સંબંધિત વિવાદો, પેન્શન મુદ્દાઓ, કાનૂની કાગળો, સેવા લાભો અને અન્ય કાનૂની પ્રશ્નોમાં નિઃશુલ્ક સલાહ આપવામાં આવશે.
લીગલ એઈડ ક્લિનિક સૈનિક સમુદાય માટે કાનૂની સહાય મેળવવાનો એક સુવ્યવસ્થિત અને સરળ માધ્યમ બની રહેશે. ઉપસ્થિત પૂર્વ સૈનિકોએ આ પહેલનું સ્વાગત કર્યું અને જણાવ્યું કે આવા કેન્દ્રો દ્વારા તેમને ઝડપી અને અસરકારક ન્યાય મેળવવામાં મદદ મળશે.
કાર્યક્રમના અંતે અધિકારીઓએ સૌને ક્લિનિકની સેવાઓનો વધુમાં વધુ લાભ લેવા માટે પ્રોત્સાહિત કર્યા અને તેને સફળ બનાવવા સહયોગ આપવા વિનંતી કરી.
---------------
હિન્દુસ્થાન સમાચાર / RINKU AMITKUMAR THAKOR
