બેંગ્લોર, નવી દિલ્હી, 15 ઓગસ્ટ (હિ.સ.). એન્ફોર્સમેન્ટ ડિરેક્ટોરેટ (ઈડી) એ, 13 અને 14 ઓગસ્ટના રોજ કર્ણાટકના ઉત્તર કન્નડ જિલ્લાના કારવારના કોંગ્રેસના ધારાસભ્ય સતીશ કૃષ્ણ શૈલના ઘરે કારવાર, ગોવા, મુંબઈ અને નવી દિલ્હી સહિત અનેક સ્થળોએ દરોડા પાડ્યા. આ દરોડા આયર્ન ઓરની ગેરકાયદેસર નિકાસ સંબંધિત કેસમાં ધારાસભ્ય સામે મની લોન્ડરિંગ તપાસના ભાગ રૂપે કરવામાં આવ્યા હતા.

શુક્રવારે જારી કરાયેલા એક નિવેદનમાં, ઈડી એ જણાવ્યું હતું કે, દરોડા દરમિયાન, 1.68 કરોડ રોકડ અને 6.75 કિલો સોનાના દાગીના, બેંક ખાતાઓમાંથી 14.13 કરોડની રકમ જપ્ત કરવામાં આવી છે. આ ઉપરાંત, ઘણા દસ્તાવેજો, ઇમેઇલ અને અન્ય મહત્વપૂર્ણ પુરાવા જપ્ત કરવામાં આવ્યા હતા.

આ કેસ 2010 માં કર્ણાટક લોકાયુક્ત દ્વારા હાથ ધરવામાં આવેલી તપાસમાંથી ઉભો થયો હતો, જેમાં બેલ્લારીથી બેલેકેરી બંદર સુધી ગેરકાયદેસર રીતે પરિવહન કરાયેલ લગભગ આઠ લાખ ટન આયર્ન ઓરનો ખુલાસો થયો હતો.

કર્ણાટક હાઈકોર્ટે ગયા વર્ષે આ કેસમાં ધારાસભ્યની સાત વર્ષની જેલની સજા સ્થગિત કરવાનો આદેશ આપ્યો હતો. એક ખાસ કોર્ટે અગાઉ બેલેકેરી બંદરમાંથી આયર્ન ઓરની ગેરકાયદેસર નિકાસ સંબંધિત અનેક કેસોમાં સેલ અને અન્ય લોકોને દોષિત ઠેરવ્યા હતા.

હિન્દુસ્થાન સમાચાર / રાકેશ મહાદેવપ્પા / અમરેશ દ્વિવેદી

હિન્દુસ્થાન સમાચાર / માધવી વ્યાસ