નવી દિલ્હી, 16 ઓગસ્ટ (હિ.સ.). ભારત રત્ન ભૂતપૂર્વ પ્રધાનમંત્રી અટલ બિહારી વાજપેયીની પુણ્યતિથિ પર, રાષ્ટ્રપતિ દ્રૌપદી મુર્મુ, પ્રધાનમંત્રી નરેન્દ્ર મોદી અને ઘણા વરિષ્ઠ નેતાઓએ શનિવારે રાજધાની દિલ્હીમાં તેમની સમાધિ 'સદૈવ અટલ' પર શ્રદ્ધાંજલિ આપી. આ પ્રસંગે લોકસભા અધ્યક્ષ ઓમ બિરલા, સંરક્ષણ મંત્રી રાજનાથ સિંહ, ભાજપના રાષ્ટ્રીય અધ્યક્ષ જગત પ્રકાશ નડ્ડા, રાજ્યસભાના ઉપાધ્યક્ષ હરિવંશ, દિલ્હીના મુખ્યમંત્રી રેખા ગુપ્તા અને અન્ય મહાનુભાવો હાજર રહ્યા હતા.

કેન્દ્રીય મંત્રીઓ કિરેન રિજિજુ, ગજેન્દ્ર સિંહ શેખાવત અને જેડી(યુ) સાંસદ સંજય ઝા એ, 'સદૈવ અટલ' પર જઈને તેમને શ્રદ્ધાંજલિ આપી. પૂર્વ પ્રધાનમંત્રી વાજપેયીની દત્તક પુત્રી નમિતા કૌલ ભટ્ટાચાર્યએ પણ શ્રદ્ધાંજલિ આપી.

પ્રધાનમંત્રી નરેન્દ્ર મોદીએ એક્સ પર પોતાના સંદેશમાં લખ્યું, તમામ દેશવાસીઓ વતી, હું ભૂતપૂર્વ પ્રધાનમંત્રી ભારત રત્ન અટલ બિહારી વાજપેયીજીને તેમની પુણ્યતિથિ પર સાદર નમન. રાષ્ટ્રના સર્વાંગી વિકાસ પ્રત્યેનું તેમનું સમર્પણ અને સેવા દરેકને વિકસિત અને આત્મનિર્ભર ભારત બનાવવા માટે યોગદાન આપવા પ્રેરણા આપે છે.

સંરક્ષણ પ્રધાન રાજનાથ સિંહે એક્સ પર લખ્યું, હું અટલજીને તેમની પુણ્યતિથિ પર શ્રદ્ધાંજલિ અર્પણ કરું છું. તેમણે તેમના સમગ્ર જીવન દરમિયાન એક મજબૂત અને સમૃદ્ધ ભારત બનાવવા માટે કામ કર્યું. રાષ્ટ્ર તેમના અભૂતપૂર્વ યોગદાનને હંમેશા યાદ રાખશે.

ભાજપ અધ્યક્ષ જે.પી. નડ્ડાએ તેમની એક્સ પોસ્ટમાં કહ્યું, હું અસંખ્ય કાર્યકરો માટે પ્રેરણા સ્ત્રોત, સુશાસનના આદર્શ મોડેલ, ભૂતપૂર્વ પ્રધાનમંત્રી, 'ભારત રત્ન' પૂજનીય અટલ બિહારી વાજપેયીજીને તેમની પુણ્યતિથિ પર મારી શ્રદ્ધાંજલિ અર્પણ કરું છું. તેમણે પોતાનું જીવન એક મજબૂત, સમૃદ્ધ અને આત્મનિર્ભર ભારત બનાવવા માટે સમર્પિત કર્યું.

વાજપેયીને શ્રદ્ધાંજલિ આપતા ગૃહમંત્રી અમિત શાહે લખ્યું, ભૂતપૂર્વ વડા પ્રધાન, ભાજપના સ્થાપક સભ્ય, ભારત રત્ન આદરણીય અટલ બિહારી વાજપેયીજીએ મૂલ્યો આધારિત રાજકારણને આગળ વધારીને વિકાસ અને સુશાસનનો મજબૂત પાયો નાખ્યો. તેમણે ક્યારેય સિદ્ધાંતો અને વિચારધારા સાથે સમાધાન કર્યું નહીં, ભલે આ માટે તેમને તેમની સરકાર ગુમાવવી પડી. તેમના નેતૃત્વમાં ભારતે પોખરણમાં સફળ પરમાણુ પરીક્ષણો કર્યા અને કારગિલ યુદ્ધમાં દુશ્મનોને યોગ્ય જવાબ આપ્યો. અટલજી તેમના વિચારો અને કાર્યો દ્વારા રાષ્ટ્ર સેવાના માર્ગ પર આપણને બધાને પ્રેરણા આપતા રહેશે. હું આદરણીય અટલજીની પુણ્યતિથિ પર તેમને નમન કરું છું.

હિન્દુસ્થાન સમાચાર / સુશીલ કુમાર / સંજીવ પાશ

હિન્દુસ્થાન સમાચાર / માધવી વ્યાસ