મહેસાણા, 27 સપ્ટેમ્બર (હિ.સ.) હવામાન વિભાગ દ્વારા રાજ્ય માટે આગામી સાત દિવસ દરમિયાન હળવાથી મધ્યમ વરસાદની આગાહી જાહેર કરવામાં આવી છે. આ આગાહી મુજબ, ખાસ કરીને બનાસકાંઠા, પાટણ અને મહેસાણા સિવાયના મોટા ભાગના જિલ્લામાં વરસાદ વરસી શકે છે. 30 સપ્ટેમ્બર સુધી વરસાદી માહોલ રહેવાની સંભાવના દર્શાવવામાં આવી છે.

વિભાગના જણાવ્યા મુજબ, બંગાળની ખાડીમાં સર્જાયેલી લો પ્રેશર સિસ્ટમ હાલમાં સક્રિય બની છે. તેના કારણે દક્ષિણ ગુજરાત, મધ્ય ગુજરાત અને સૌરાષ્ટ્રના અનેક વિસ્તારોમાં છૂટાછવાયા વરસાદી ઝાપટા પડી શકે છે. ઉત્તર ગુજરાતના કેટલાક જિલ્લામાં પણ વાતાવરણમાં ભેજ વધતા છૂટક છૂટક વરસાદની શક્યતા છે.

વરસાદ સાથે ગાજવીજની ઘટનાઓ અને 30 થી 40 કિ.મી. પ્રતિ કલાકની ઝડપે પવન ફૂંકાવાની સંભાવના છે. ખેડૂતોને સલાહ આપવામાં આવી છે કે તેઓ પાકની કાપણી અથવા કીટનાશક દવાઓના છંટકાવ જેવા કાર્યો વરસાદને ધ્યાનમાં રાખીને આયોજન કરે. સાથે જ ગામડાઓમાં નીચાણવાળા વિસ્તારોમાં પાણી ભરાવાની સ્થિતિ સર્જાય તો તકેદારી રાખવી જરૂરી છે.

રાજ્યમાં ચાલતી ખેતી સીઝનમાં આ વરસાદ ખેડૂતો માટે લાભદાયી સાબિત થઈ શકે છે. ખાસ કરીને શિયાળુ પાકની તૈયારીમાં ભેજની આવશ્યકતા પૂરી થશે. બીજી તરફ, સતત વરસાદી ઝાપટાઓ આવતા શહેરોમાં ટ્રાફિક અને જનજીવન પર થોડો પ્રભાવ પડી શકે છે.

હવામાન વિભાગે નાગરિકોને અપીલ કરી છે કે ગાજવીજ દરમિયાન ખુલ્લા મેદાનમાં ન રહેવા, વીજ થાંભલા કે વૃક્ષ નીચે ઊભા ન રહેવા અને સાવચેતીના પગલાં લેવા. 30 સપ્ટેમ્બર સુધી રાજ્યમાં વરસાદી માહોલ જળવાઈ રહેવાની પૂરી શક્યતા છે.

.

હિન્દુસ્થાન સમાચાર / RINKU AMITKUMAR THAKOR