વડોદરા, 3 સપ્ટેમ્બર (હિ.સ.) વડોદરામાં કોંગ્રેસના ગુજરાત પ્રદેશ પ્રવક્તા શ્રી મનીષ દોષી દ્વારા આજે પત્રકાર પરિષદ યોજાઈ હતી. આ પ્રસંગે તેમણે રાજ્ય સરકારની નીતિઓ, વધતા ભ્રષ્ટાચારના કિસ્સાઓ તથા જનતા માટેના પ્રશ્નો પર ખુલાસો કરતાં સરકારને કટઘરમાં ઊભી કરી. મનીષ દોષીએ જણાવ્યું હતું કે ગુજરાતમાં વિકાસના નામે માત્ર જાહેરાતો થઈ રહી છે, જ્યારે હકીકતમાં જનતા મોંઘવારી, બેરોજગારી અને સ્વાસ્થ્ય સેવાઓના અભાવ જેવી ગંભીર સમસ્યાઓનો સામનો કરી રહી છે.

તેમણે વધુમાં ઉમેર્યું હતું કે સરકાર દ્વારા શિક્ષણ અને આરોગ્ય ક્ષેત્રે પૂરતું ધ્યાન આપવામાં આવતું નથી. ગ્રામ્ય વિસ્તારોમાં આરોગ્ય સુવિધાઓ અપર્યાપ્ત છે તથા શાળાઓમાં શિક્ષકોની ખોટ વર્તાઈ રહી છે. કોંગ્રેસના પ્રવક્તાએ રાજ્ય સરકાર પર આક્ષેપ કરતાં કહ્યું કે ખેડૂતોના પ્રશ્નો હજી યથાવત છે, પાણી અને વીજળીની અછતને કારણે ખેડૂતો પરેશાન છે અને તેમની માંગણીઓ વારંવાર અવગણવામાં આવી રહી છે.

મનીષ દોષીએ ખાસ કરીને વડોદરા શહેરના મુદ્દાઓ પર પણ પ્રકાશ પાડ્યો. તેમણે જણાવ્યું કે શહેરમાં વધતા ટ્રાફિક, ગંદકી, પાણી પુરવઠા તેમજ તંત્રની બેદરકારીને કારણે નાગરિકોને ભારે મુશ્કેલી પડી રહી છે. ભાજપ શાસિત સ્થાનિક તંત્ર માત્ર રાજકીય દેખાવમાં વ્યસ્ત રહીને નાગરિકોના પ્રશ્નોનો ઉકેલ લાવવા નિષ્ફળ રહ્યું છે.

આ ઉપરાંત તેમણે કોંગ્રેસ પાર્ટીની આગાહી તથા આવનારા ચૂંટણીઓ માટેની રણનીતિ અંગે પણ માહિતી આપી. દોષીએ જણાવ્યું કે કોંગ્રેસ નાગરિકોના હિત માટે લડી રહી છે અને આગામી દિવસોમાં જનતાના હિત માટે અનેક કાર્યક્રમો તથા આંદોલનો યોજવામાં આવશે.

પત્રકાર પરિષદના અંતે મનીષ દોષીએ રાજ્ય સરકારને ચેતવણી આપી હતી કે જો જનતા સામેના પ્રશ્નોનો ઉકેલ લાવવામાં નહીં આવે તો કોંગ્રેસ જનતાને સાથે લઈને ઉગ્ર આંદોલન કરશે.

હિન્દુસ્થાન સમાચાર / Dhruvik Nandrambhai Gondliya