અમરેલી, 16 જાન્યુઆરી (હિ.સ.) : જીથુડી ખાતે ગામના સર્વાંગી વિકાસને આગળ ધપાવવાના ઉદ્દેશ્ય સાથે વિવિધ વિકાસ પ્રકલ્પોના ખાતમુહૂર્ત કાર્યક્રમનું આયોજન કરવામાં આવ્યું હતું. આ કાર્યક્રમમાં કોશિક વેકારીયાની ઉપસ્થિતિમાં અંદાજિત રૂ. ૨૬ લાખના વિકાસ કાર્યોનું ખાતમુહૂર્ત કરવામાં આવ્યું. આ વિકાસ પ્રકલ્પોમાં ગામની આંતરિક સુવિધાઓ મજબૂત બને તેવા કામોનો સમાવેશ થાય છે, જેમ કે રસ્તા સુધારણા, નિકાસ વ્યવસ્થા, જાહેર સુવિધાઓનું વિકાસ તેમજ અન્ય આવશ્યક માળખાકીય કાર્યો. ગ્રામજનોને દૈનિક જીવનમાં વધુ સુવિધા મળે અને ગામનું આધુનિકીકરણ થાય તે દિશામાં આ પ્રકલ્પો મહત્વપૂર્ણ સાબિત થશે.

ખાતમુહૂર્ત પ્રસંગે મંત્રી કોશિક વેકારીયાએ જણાવ્યું હતું કે ગ્રામ વિકાસ સરકારની પ્રાથમિકતા છે અને ગામડાં મજબૂત બનશે તો જિલ્લાનો સર્વાંગી વિકાસ શક્ય બનશે. તેમણે ઉમેર્યું કે વિકાસ કાર્યોમાં ગુણવત્તા અને પારદર્શિતા જળવાઈ રહે તે માટે ખાસ ધ્યાન આપવામાં આવશે. કાર્યક્રમ દરમિયાન ગ્રામ પંચાયતના પ્રતિનિધિઓ, સ્થાનિક આગેવાનો અને મોટી સંખ્યામાં ગ્રામજનો હાજર રહ્યા હતા. વિકાસ કાર્યોની શરૂઆતથી જીથુડી ગામમાં ખુશીનો માહોલ જોવા મળ્યો હતો અને ગ્રામજનોએ આ પહેલને આવકારી હતી.

---------------

હિન્દુસ્થાન સમાચાર / Gondaliya Abhishek Nandrambhai