મહેસાણા,02 જાન્યુઆરી (હિ.સ.) : મુખ્યમંત્રી ભૂપેન્દ્રભાઈ પટેલના વરદ હસ્તે મહેસાણા મહાનગરપાલિકા દ્વારા તાલુકા પંચાયત કચેરી પાસે રોડસાઈડ જગ્યાએ વિકસાવવામાં આવેલ સ્પેસ મેકિંગ પ્રોજેક્ટનું ભવ્ય લોકાર્પણ કરવામાં આવ્યું. આ પ્રસંગે સ્થાનિક જનપ્રતિનિધિઓ, અધિકારીઓ તથા મોટી સંખ્યામાં નાગરિકો ઉપસ્થિત રહ્યા હતા.

આ સ્પેસ મેકિંગ પ્રોજેક્ટ શહેરના સૌંદર્યીકરણ સાથે જાહેર ઉપયોગિતાને ધ્યાનમાં રાખીને વિકસાવવામાં આવ્યો છે. પ્રોજેક્ટ અંતર્ગત રોડસાઈડ વિસ્તારમાં આધુનિક બેઠકો, હરિયાળી, લાઇટિંગ, પાથવે તેમજ સુવ્યવસ્થિત ખુલ્લી જગ્યા તૈયાર કરવામાં આવી છે, જે નાગરિકોને આરામ, મનોરંજન અને સામાજિક પ્રવૃત્તિઓ માટે ઉપયોગી બનશે. ખાસ કરીને રાહદારીઓ અને નજીકની કચેરીઓમાં આવનાર લોકોને આ જગ્યા વિશેષ સુવિધા પૂરી પાડશે.

લોકાર્પણ પ્રસંગે મુખ્યમંત્રીએ મહાનગરપાલિકાની કામગીરીની પ્રશંસા કરી અને જણાવ્યું કે આવા વિકાસાત્મક પ્રોજેક્ટો શહેરના સર્વાંગી વિકાસમાં મહત્વની ભૂમિકા ભજવે છે. તેમણે નાગરિકોને જાહેર સંપત્તિનું સંરક્ષણ કરવા અને તેનો યોગ્ય ઉપયોગ કરવા અનુરોધ કર્યો. આ પ્રોજેક્ટથી મહેસાણા શહેરના શહેરી માળખામાં નવી ઓળખ ઊભી થશે તેમજ નાગરિકોને વધુ સુખાકારી અને સુવિધાજનક વાતાવરણ મળશે.

---------------

હિન્દુસ્થાન સમાચાર / RINKU AMITKUMAR THAKOR