અમરેલી, 06 જાન્યુઆરી (હિ.સ.) અમરેલી જિલ્લાના કુંકાવાવ તાલુકાના મોટા ઉજળા ગામ ખાતે આત્મા (ATMA) પ્રોજેક્ટ અંતર્ગત જિલ્લા અંદરની મહત્વપૂર્ણ તાલીમનું આયોજન કરવામાં આવ્યું હતું. આ તાલીમ કાર્યક્રમનો મુખ્ય હેતુ ખેડૂતોને આધુનિક ખેતી પદ્ધતિ, નવી ટેક્નોલોજી અને સરકારની વિવિધ કૃષિ યોજનાઓ અંગે માર્ગદર્શન આપવાનો રહ્યો હતો.

આ કાર્યક્રમમાં KVK અમરેલીના વૈજ્ઞાનિકોએ હાજરી આપી હતી અને ખેડૂતોને પાક વ્યવસ્થાપન, જમીન આરોગ્ય, ખાતરનો યોગ્ય ઉપયોગ, જીવાત-રોગ નિયંત્રણ તેમજ ખર્ચ ઘટાડીને ઉત્પાદન વધારવા અંગે વિગતવાર માહિતી આપી હતી. વૈજ્ઞાનિકોના માર્ગદર્શનથી ખેડૂતોને પ્રાયોગિક અને ઉપયોગી જાણકારી મળી હોવાનું ખેડૂતોએ જણાવ્યું હતું.

તાલીમ કાર્યક્રમમાં આત્મા પ્રોજેક્ટમાંથી DPD (ડિસ્ટ્રિક્ટ પ્રોજેક્ટ ડિરેક્ટર), BTM (બ્લોક ટેક્નોલોજી મેનેજર) તથા ATM (અસિસ્ટન્ટ ટેક્નોલોજી મેનેજર) પણ ઉપસ્થિત રહ્યા હતા. તેમણે આત્મા પ્રોજેક્ટ અંતર્ગત મળતી વિવિધ સહાય, તાલીમ યોજનાઓ અને ખેડૂતલક્ષી પ્રવૃત્તિઓ અંગે વિસ્તૃત માહિતી આપી હતી.

મોટા ઉજળા ગામના ખેડૂતો મોટી સંખ્યામાં આ તાલીમમાં જોડાયા હતા. ખેડૂતોનું માનવું છે કે આવી તાલીમોથી નવી માહિતી મળે છે અને ખેતીમાં નવીનતા અપનાવવાની પ્રેરણા મળે છે. આત્મા પ્રોજેક્ટ દ્વારા યોજાયેલ આ તાલીમ કાર્યક્રમ ખેડૂતોના સર્વાંગી વિકાસ તરફનું એક મહત્વપૂર્ણ પગલું સાબિત થયું છે.

હિન્દુસ્થાન સમાચાર / Gondaliya Abhishek Nandrambhai