- પોરબંદર જિલ્લા પ્રભારી મંત્રી કુંવરજી બાવળિયાના અધ્યક્ષ સ્થાને પ્રેસ કોન્ફરન્સ યોજાઈ.

પોરબંદર, 07 જાન્યુઆરી (હિ.સ.) : પોરબંદર જિલ્લાની મુલાકાતે પધારેલા પ્રભારી મંત્રી કુંવરજી બાવળિયાએ જિલ્લા કલેક્ટર કચેરી ખાતે પત્રકાર પરિષદ સંબોધી હતી. આ તકે તેમણે કેન્દ્ર સરકાર દ્વારા તાજેતરમાં અમલી બનાવાયેલ 'વિકસિત ભારત ગેરંટી ફોર રોજગાર એન્ડ આજીવિકા મિશન (ગ્રામીણ)' - VB-GRAM G ACT, 2025 ને ગ્રામીણ શ્રમિકો અને ખેડૂતો માટે એક ઐતિહાસિક અને ક્રાંતિકારી પગલું ગણાવ્યું હતું.

મંત્રીએ જણાવ્યું હતું કે, વડાપ્રધાન નરેન્દ્ર મોદીના નેતૃત્વમાં તૈયાર કરાયેલ આ નવો અધિનિયમ છેવાડાના માનવીને આર્થિક સુરક્ષા આપવાની સાથે ગ્રામીણ અર્થતંત્રને નવી ગતિ પ્રદાન કરશે.

મંત્રીએ આ નવા કાયદાની વિશેષતાઓ વર્ણવતા કહ્યું હતું કે, હવે ગ્રામીણ શ્રમિકોને વર્ષમાં 100 દિવસના બદલે 125 દિવસની રોજગારીની ગેરંટી આપવામાં આવશે. આ ઉપરાંત, બેરોજગારી ભથ્થાની પ્રક્રિયાને સરળ બનાવવામાં આવી છે, જેથી જો કામ માંગ્યા પછી રોજગાર ન મળે, તો શ્રમિકને આપોઆપ ભથ્થું મેળવવાનો અધિકાર રહેશે. ગ્રામીણ સ્તરે આયોજનની સ્વાયત્તતા આપતા હવે 'વિકસિત ગ્રામ પંચાયત પ્લાન' ગ્રામસભા દ્વારા જ નક્કી કરવામાં આવશે, જેમાં જળ સંરક્ષણ, માળખાગત સુવિધાઓ, આજીવિકા વૃદ્ધિ અને ક્લાઈમેટ ચેન્જ સામે લડવા માટેના કામોને પ્રાધાન્ય અપાશે.

ખાસ કરીને કૃષિ અને શ્રમ વચ્ચે સંતુલન જાળવવા માટે, આ એક્ટમાં જોગવાઈ કરાઈ છે કે ખેતીની સીઝન (વાવણી અને લણણી) દરમિયાન 60 દિવસ માટે આ યોજનાના કામો સ્થગિત રાખી શકાશે, જેથી ખેતીકામમાં મજૂરોની અછત ન સર્જાય. મંત્રીએ ઉમેર્યું હતું કે, વહીવટી ખર્ચની મર્યાદા 6% થી વધારી 9% કરવાથી ફિલ્ડ ઓફિસરોની કામગીરી વધુ સુદ્રઢ બનશે અને યોજનાનો લાભ છેવાડાના માનવી સુધી પારદર્શક રીતે પહોંચશે.

---------------

હિન્દુસ્થાન સમાચાર / Tejas Pravinbhai Dholariya