ટુકડે-ટુકડે મળતી વીજળીએ ખેતીકામ ખોરવ્યું, પાક સુકાઈ જવાની ચિંતા વચ્ચે ખેડૂતોનો સ્પષ્ટ સૂરઃ સમસ્યાનો ઉકેલ આવે ત્યાં સુધી રજૂઆત ચાલુ રાખવાનો નિર્ધાર

કચ્છ, 17 ઓક્ટોબર (હિ.સ.) : કચ્છના વિથોણ પંથકમાં ખેતીવાડી માટેના વીજ પુરવઠાની અનિયમિતતાને કારણે ખેડૂતોની મુશ્કેલીઓ વધી રહી છે. વિથોણ 66 કેવી અને થરાવડા કેવી હેઠળ આવતા વિસ્તારોમાં વીજળી ટુકડે-ટુકડે મળતી હોવાની ફરિયાદ સાથે ખેડૂતોમાં ભારે અસંતોષ ફેલાયો છે. ખેતીના પાકને સમયસર પાણી આપવું જરૂરી બન્યું છે, ત્યારે વીજળીની અનિશ્ચિતતાએ ખેડૂતોની ચિંતા વધારી છે. આ સમસ્યાથી પરેશાન ખેડૂતોએ પોતાના રોજિંદા કામકાજ બાજુએ રાખીને PGVCLની ડિવિઝન કચેરીએ પહોંચી તંત્ર સમક્ષ રજૂઆત કરી હતી.

ખેડૂતો માટે ખેતી માત્ર રોજગારનું સાધન જ નહીં, પરંતુ આખા પરિવારની આજીવિકાનો આધાર છે. સિંચાઈના અભાવે પાકની વૃદ્ધિ પર અસર થવાની અને ઉત્પાદન ઘટવાની ભીતિ રહે છે. આવા સંજોગોમાં વીજ પુરવઠો નિયમિત ન મળવાથી ખેતરમાં પાણી પહોંચાડવાનું આયોજન ખોરવાઈ જાય છે. ક્યારે વીજળી મળશે અને કેટલો સમય મળશે તેની અનિશ્ચિતતાને કારણે ખેતીનાં કામો સમયસર પૂર્ણ કરવામાં પણ મુશ્કેલી ઊભી થઈ રહી છે.

આ પરિસ્થિતિથી કંટાળેલા ખેડૂતો મોટી સંખ્યામાં PGVCLની ડિવિઝન કચેરીએ પહોંચ્યા હતા. ખેડૂતોએ વીજ પુરવઠાની સમસ્યાનું યોગ્ય નિરાકરણ લાવવાની માંગ સાથે પોતાની મુશ્કેલીઓ અધિકારીઓ સમક્ષ રજૂ કરી હતી. રજૂઆત દરમિયાન ખેડૂતોએ સંતોષકારક જવાબ અને સમસ્યાના ઉકેલની ખાતરી ન મળે ત્યાં સુધી સ્થળ નહીં છોડવાનો મક્કમ અભિગમ દર્શાવ્યો હતો. ખેડૂતોની મુખ્ય માંગ છે કે વિથોણ 66 કેવી અને થરાવડા કેવી હેઠળના વિસ્તારોમાં વીજ પુરવઠો નિયમિત કરવામાં આવે, જેથી સિંચાઈની કામગીરીમાં વારંવાર અવરોધ ન આવે.

આ રજૂઆતમાં કિસાન સંઘ શક્તિ કેન્દ્રના પ્રમુખ નાનજીભાઈ નાકરાણી, વિથોણ કિસાન સંઘના પ્રમુખ વિઠ્ઠલભાઈ ભગત અને વિથોણ વિસ્તાર કિસાન સંઘના મહામંત્રી શાંતિલાલ નાયાણી સહિત આસપાસના વિસ્તારોના મોટી સંખ્યામાં ખેડૂતો જોડાયા હતા.

હવે ખેડૂતોની આ રજૂઆત બાદ PGVCL તંત્ર શું પગલાં ભરે છે તેના પર સૌની નજર મંડાઈ છે. ખેડૂતોને આશા છે કે તંત્ર તેમની સમસ્યાને ગંભીરતાથી લઈને વીજ પુરવઠો નિયમિત કરશે, જેથી ખેતીકામ સરળ બને અને મહેનતથી તૈયાર કરેલા પાકને બચાવી શકાય.

---------------

હિન્દુસ્થાન સમાચાર / Rohit Ramjibhai Padhiyar