પોરબંદર, 17 ઓક્ટોબર (હિ.સ.)પોરબંદર મહાનગરપાલિકા દ્વારા વર્ષ 2014થી 2017 દરમિયાન ફરજ બજાવનાર આશરે 22 સફાઈ કર્મચારીઓની બાકી નીકળતી

એરિયર્સની રકમ ચૂકવવા માટે હુકમ કરવામાં આવ્યો છે. આ પૈકી કેટલાક કર્મચારીઓનું

અવસાન થયું હોવાથી તેમના સીધી લીટીના વારસદારોને બાકી નીકળતી રકમ ચૂકવી શકાય તે

માટે જરૂરી હુકમપત્રો તૈયાર કરવામાં આવ્યા છે. આ હુકમપત્રોનું વિતરણ કરવા માટે

પોરબંદર મહાનગરપાલિકાના સભાખંડ ખાતે કાર્યક્રમ યોજવામાં આવ્યો હતો, જેમાં ઉપસ્થિત મહાનુભાવોના હસ્તે

સંબંધિત કર્મચારીઓના વારસદારોને હુકમપત્રો એનાયત કરવામાં આવ્યા હતા.

મહાનગરપાલિકામાં ફરજ બજાવતા સફાઈ કર્મચારીઓ શહેરની સ્વચ્છતા જાળવવામાં

મહત્ત્વપૂર્ણ ભૂમિકા ભજવે છે. શહેરના જાહેર માર્ગો, રહેણાક વિસ્તારો અને જાહેર સ્થળોની સ્વચ્છતા જાળવવા માટે સફાઈ

કર્મચારીઓ સતત પોતાની સેવાઓ આપે છે. આવા કર્મચારીઓના વર્ષ 2014થી 2017ના સમયગાળાના બાકી એરિયર્સના પ્રશ્નના

નિરાકરણ માટે મહાનગરપાલિકા દ્વારા કાર્યવાહી હાથ ધરવામાં આવી છે. આ અંતર્ગત કુલ 22 જેટલા કર્મચારીઓની બાકી નીકળતી રકમ

ચૂકવવા માટે હુકમપત્રો આપવામાં આવ્યા છે. આ પૈકી કેટલાક કર્મચારીઓનું અવસાન થયું

હોવાથી તેમના પરિવારજનોને મળવાપાત્ર રકમની ચુકવણી માટે પણ જરૂરી પ્રક્રિયા હાથ

ધરવામાં આવી છે. અવસાન પામેલા કર્મચારીઓના સીધી લીટીના વારસદારોને બાકી એરિયર્સની

રકમ ચૂકવવા માટે હુકમ કરવામાં આવતાં સંબંધિત પરિવારોને તેમના હકની રકમ મેળવવાનો

માર્ગ મોકળો થયો છે. હુકમપત્રોના વિતરણથી લાંબા સમયથી બાકી રહેલા લેણાંના પ્રશ્નના

ઉકેલ તરફ મહત્ત્વપૂર્ણ પગલું ભરવામાં આવ્યું છે. મહાનગરપાલિકાના સભાખંડ ખાતે

યોજાયેલા આ કાર્યક્રમમાં સેનિટેશન કમિટીના ચેરમેન વનરાજભાઈ કેશવાલા, શહેરી ગરીબી સમાજ કલ્યાણ સમિતિના

ચેરમેન યોગેશભાઈ પુનાણી, સેનિટેશન શાખાના અધિકારી જગદીશભાઈ

ઢાંકી, વાલ્મીકી સમાજના પૂર્વ પ્રમુખ અજયભાઈ

પુનાણી, ભીખુભાઈ ધીરુભાઈ ઝાલા, અગ્રણી ભરતભાઈ ઝાલા તથા સેનિટેશન

શાખાના ક્લાર્ક જગદીશભાઈ મોતીવરસ સહિતના મહાનુભાવો ઉપસ્થિત રહ્યા હતા. તેમની

હાજરીમાં સંબંધિત કર્મચારીઓ અને તેમના વારસદારોને હુકમપત્રો એનાયત કરવામાં આવ્યા

હતા. આમ, પોરબંદર મહાનગરપાલિકા દ્વારા સફાઈ

કર્મચારીઓના બાકી લેણાંની ચુકવણી માટે હુકમપત્રો એનાયત કરવાની આ કાર્યવાહીથી

કર્મચારીઓ અને તેમના પરિવારજનોને મળવાપાત્ર નાણાકીય લાભ મેળવવાની પ્રક્રિયાને આગળ

ધપાવવામાં આવી છે. તથા તેઓને એકાઉન્ટ શાખામાં આપેલ હુકમ રજૂ કર્યા બાદ ચેકથી

ચુકવણું કરી આપવામાં આવશે.

---------------

હિન્દુસ્થાન સમાચાર / Tejas Pravinbhai Dholariya