અમરેલી, 19 ઓક્ટોબર (હિ.સ.) : અમરેલી જિલ્લામાં વન્યપ્રાણીઓની અવરજવર વચ્ચે વડીયા તાલુકાના હનુમાન ખીજડીયા ગામમાં દીપડાના શિકારની ઘટના સામે આવી છે. મોડી રાત્રિના સમયે ગામની શેરીમાં ઘૂસી આવેલા દીપડાએ શેરીમાં સૂતેલા શ્વાનનો શિકાર કર્યો હતો. દીપડાની આ સમગ્ર શિકારની ઘટના ગામમાં લગાવવામાં આવેલા CCTV કેમેરામાં કેદ થઈ છે.

પ્રાપ્ત વિગતો અનુસાર, હનુમાન ખીજડીયા ગામમાં મોડી રાત્રિના સમયે દીપડો આવી પહોંચ્યો હતો. આ દરમિયાન ગામની શેરીમાં શ્વાન સૂતેલું હતું. દીપડાએ અચાનક શ્વાન પર હુમલો કરીને તેને પોતાનો શિકાર બનાવ્યો હતો. દીપડાની શિકાર કરવાની આ ઘટના CCTV કેમેરામાં કેદ થતાં વન્યપ્રાણીની ગામમાં હાજરી સામે આવી છે.

અમરેલી જિલ્લો ગીરના જંગલ વિસ્તારની નજીક આવેલો હોવાથી અનેક વિસ્તારોમાં સિંહ અને દીપડા સહિતનાં વન્યપ્રાણીઓની અવરજવર જોવા મળે છે. ત્યારે વડીયાના હનુમાન ખીજડીયા ગામમાં બનેલી આ ઘટનાએ ફરી એકવાર માનવ વસાહતોમાં વન્યપ્રાણીઓની હાજરી તરફ ધ્યાન દોર્યું છે.

ગામની શેરીમાં દીપડાએ શ્વાનનો શિકાર કર્યો હોવાના CCTV દૃશ્યો સ્થાનિકોમાં ચર્ચાનો વિષય બન્યા છે. ગ્રામજનોમાં પણ આ ઘટનાને લઈને સાવચેતી રાખવાની જરૂરિયાત ઊભી થઈ છે.

---------------

હિન્દુસ્થાન સમાચાર / Gondaliya Abhishek Nandrambhai