કચ્છ, 23 ઓક્ટોબર (હિ.સ.) કચ્છમાં જુગારની પ્રવૃત્તિઓ પર અંકુશ લાવવા પોલીસ દ્વારા હાથ ધરવામાં આવતી કામગીરીના ભાગરૂપે ગાંધીધામ એ-ડિવિઝન પોલીસને સફળતા મળી છે. ગાંધીધામના ગળપાદર નવાવાસ વિસ્તારમાં બાતમીના આધારે કાર્યવાહી કરીને પોલીસે કથિત રીતે જુગાર રમતા ત્રણ શખ્સોને ઝડપી પાડ્યા હતા. પોલીસની આ કાર્યવાહીમાં રોકડ રકમ અને ગંજીપાનાં સહિત કુલ રૂ. 10,210નો મુદ્દામાલ કબજે કરવામાં આવ્યો છે.

પ્રાપ્ત વિગતો મુજબ, પોલીસનો સર્વેલન્સ સ્ટાફ પેટ્રોલિંગમાં હતો ત્યારે ગળપાદર નવાવાસ વિસ્તારમાં જુગાર રમાતો હોવાની ખાનગી બાતમી મળી હતી. બાતમીના આધારે પોલીસે સ્થળ પર પહોંચી તપાસ હાથ ધરી હતી. આ કાર્યવાહી દરમિયાન ત્રણ વ્યક્તિઓને ઝડપી લેવામાં આવ્યા હતા. પોલીસે તેમની ઓળખ નવીન આલાભાઈ વિરડા , દામજી કેશાભાઈ સોલંકી અને ભીમજી કેશાભાઈ સોલંકી તરીકે કરી છે. ત્રણેય આરોપીઓ ગળપાદર નવાવાસ, ગાંધીધામના રહેવાસી હોવાનું પોલીસની વિગતોમાં જણાવાયું છે.

પોલીસે સ્થળ પરથી ગંજીપાનાંના 52 પાનાં અને રોકડા રૂ. 10,210 કબજે કર્યા હતા. ગંજીપાનાંની કિંમત શૂન્ય દર્શાવવામાં આવી છે, જ્યારે રોકડ સહિત કબજે કરાયેલા મુદ્દામાલની કુલ કિંમત રૂ. 10,210 નોંધાઈ છે. આ મામલે પોલીસે ત્રણેય શખ્સો સામે જુગારધારા હેઠળ કાયદેસરની કાર્યવાહી હાથ ધરી છે.

ગાંધીધામ એ-ડિવિઝન પોલીસની આ કાર્યવાહીથી વિસ્તારમાં જુગારની પ્રવૃત્તિઓ સામે પોલીસની સતર્કતા ફરી એકવાર સામે આવી છે. ગેરકાયદે પ્રવૃત્તિઓને રોકવા માટે પેટ્રોલિંગ અને બાતમીના આધારે તપાસની કામગીરી આગળ પણ ચાલુ રાખવામાં આવશે.

હિન્દુસ્થાન સમાચાર / Rohit Ramjibhai Padhiyar