વારાણસી, નવી દિલ્હી, 25 ઓક્ટોબર (હિ.સ.) વડાપ્રધાન નરેન્દ્ર મોદી રવિવારે સવારે તેમના સંસદીય ક્ષેત્ર વારાણસી પહોંચ્યા. બાબતપુર સ્થિત લાલ બહાદુર શાસ્ત્રી આંતરરાષ્ટ્રીય હવાઈ અડ્ડા પર વડાપ્રધાન વિશેષ વિમાનથી જેવા જ એપ્રન પર ઉતર્યા, ત્યાં પહેલાથી હાજર મહાનુભાવોએ પુષ્પગુચ્છ આપીને તેમનું સ્વાગત કર્યું.

આ દરમિયાન, એરપોર્ટના એપ્રન પર જ પ્રદેશના નાણાં અને સંસદીય તથા જિલ્લાના પ્રભારી મંત્રી સુરેશ ખન્ના, અન્ય જનપ્રતિનિધિઓ, ભાજપના પદાધિકારીઓ અને જિલ્લાના વહીવટી અધિકારીઓ પણ સ્વાગત માટે કતારબદ્ધ રહ્યા. એરપોર્ટથી વડાપ્રધાન મિર્ઝામુરાદ ખોચવાં માટે વાયુસેનાના હેલિકોપ્ટરથી રવાના થયા. વડાપ્રધાન મિર્ઝામુરાદ ક્ષેત્રના ખોચવાં સ્થિત અરવિંદ લિમિટેડના નવા ઔદ્યોગિક એકમનું ઉદ્ઘાટન કરશે અને નમો ઘાટ પર આયોજિત ‘વિંગ્સ ઓવર ગંગા’ એર શોનું પ્રદર્શન જોશે.

ભારતીય વાયુસેનાની 94મી વર્ષગાંઠના અવસરે આયોજિત ‘એર ફોર્સ ડે એરિયલ ડિસ્પ્લે-2026’ના અંતિમ દિવસે ગંગા ઉપર ભારતીય વાયુસેનાના લડાકુ વિમાનો, હેલિકોપ્ટરો અને અન્ય વિમાનોના હવાઈ કરતબ જોવા મળશે. કાર્યક્રમમાં રક્ષા મંત્રી રાજનાથ સિંહ અને મુખ્યમંત્રી યોગી આદિત્યનાથ સહિત અન્ય મહાનુભાવોની ઉપસ્થિતિ રહેશે.

કાશીમાં વડાપ્રધાન નરેન્દ્ર મોદીના લગભગ 4:30 કલાકના પ્રવાસને ધ્યાનમાં રાખીને, તેમના કાર્યક્રમ સ્થળ અને આવવા-જવાના માર્ગ પર સુરક્ષાની વ્યાપક વ્યવસ્થા કરવામાં આવી છે. કાર્યક્રમ સ્થળ અને આસપાસનો સમગ્ર વિસ્તાર નો ફ્લાય ઝોન જાહેર કરવામાં આવ્યો છે. આસપાસના મકાનોની છત પર ફોર્સની તૈનાતી સાથે સીસીટીવી અને ડ્રોન દ્વારા એક-એક ગતિવિધિ પર નજર રાખવામાં આવી રહી છે.

વડાપ્રધાન ખોચવાં સ્થિત અરવિંદ લિમિટેડના નવા ઔદ્યોગિક એકમનું ઉદ્ઘાટન કરશે. વડાપ્રધાન અહીં તાલીમ મેળવી ચૂકેલી લગભગ 300 મહિલા કર્મચારીઓ સાથે સંવાદ કરશે અને તેમના અનુભવો જાણશે. આ એકમમાં લગભગ 1,000 સ્થાનિક મહિલાઓને રોજગાર આપવાની યોજના છે. આનાથી ક્ષેત્રમાં મહિલા રોજગારની તકો વધવાની અપેક્ષા છે. પ્રદેશની યોગી આદિત્યનાથ સરકારની રોકાણ પ્રોત્સાહન પહેલ ‘ઇન્વેસ્ટ યુપી’ હેઠળ લગભગ 150 કરોડ રૂપિયાના ખર્ચે સાત એકર વિસ્તારમાં અરવિંદ લિમિટેડનું આ એકમ સ્થાપિત કરવામાં આવ્યું છે. અહીં અન્ડરગાર્મેન્ટ્સ, ટી-શર્ટ, શોર્ટ્સ અને લોઅર જેવા વસ્ત્રો તૈયાર કરવામાં આવશે. આ ઉત્પાદનોની નિકાસ કરવાની પણ યોજના છે. એકમમાં ઉત્પાદન સાથે સ્થાનિક મહિલાઓની તાલીમ અને રોજગાર પર પણ ભાર મૂકવામાં આવ્યો છે.

હિન્દુસ્થાન સમાચાર / શ્રીધર ત્રિપાઠી / મહેશ પટૈરિયા / મુકુંદ

હિન્દુસ્થાન સમાચાર / માધવી વ્યાસ