થેની (તમિલનાડુ), નવી દિલ્હી, 27 ઓક્ટોબર (હિ.સ.). તમિલનાડુના થેની જિલ્લાની એક ઉપજેલમાંથી, સોમવારે મોડી રાત્રે કર્મચારીઓ પર કથિત હુમલો કર્યા પછી 17 કેદીઓ ફરાર થઈ ગયા. પડોશી જિલ્લાઓમાં શોધખોળ અભિયાન તેજ કરી દેવામાં આવ્યું છે. પોલીસે એકની ધરપકડ કરી લીધી છે અને બાકીના 16 કેદીઓની શોધખોળ માટે 17 વિશેષ ટીમોની રચના કરવામાં આવી છે.

દક્ષિણ ક્ષેત્રના પોલીસ મહાનિરીક્ષક વિજયેન્દ્ર બિદરીએ જણાવ્યું કે, ધરપકડ કરાયેલો કેદી મદુરાઈનો રહેવાસી છે. તેને થેક્કમપટ્ટી ઉપજેલ પાછળના જંગલ વિસ્તારમાં ચલાવવામાં આવેલા શોધખોળ અભિયાન દરમિયાન પકડવામાં આવ્યો. બિદરીએ કહ્યું, “શોધખોળ અભિયાન દરમિયાન પોલીસે ફરાર કેદીઓમાંથી એકની ધરપકડ કરી લીધી છે.”

પોલીસના જણાવ્યા અનુસાર, તમામ 17 કેદીઓને એક જ બેરેકમાં રાખવામાં આવ્યા હતા. જેલ કર્મચારીઓને માહિતી મળી હતી કે એક કેદીની તબિયત ખરાબ છે. આ પછી જ્યારે કર્મચારીઓ બેરેકમાં પહોંચ્યા, ત્યારે કેદીઓએ કથિત રીતે તેમના પર હુમલો કરી દીધો અને ત્યાંથી ફરાર થઈ ગયા. બિદરીએ કહ્યું કે કેદીઓએ પોતાની યોજના હેઠળ “વાઈનો હુમલો આવવાનો ઢોંગ” કર્યો.

આ કથિત હુમલામાં થેની જિલ્લા જેલમાં તૈનાત ગ્રેડ-2 પોલીસકર્મી થંગાપાંડીના માથામાં ઈજા થઈ છે. તેમને જી વિલક્કૂ સ્થિત સરકારી હોસ્પિટલમાં દાખલ કરવામાં આવ્યા છે. પોલીસે જણાવ્યું કે જેલના અન્ય બે કર્મચારીઓને પણ સામાન્ય ઈજાઓ થઈ છે.

ડિંડીગુલના પોલીસ અધિક્ષક એસ. જયકુમારે જણાવ્યું કે, સાવચેતીના ભાગરૂપે જિલ્લામાં 16 સ્થળોએ તપાસ ચોકીઓ સ્થાપિત કરવામાં આવી છે. ડિંડીગુલ-થેની હાઈવે પર પણ વાહનોની તપાસ કરવામાં આવી રહી છે.

મદુરાઈ, ડિંડીગુલ અને ઇડુક્કીની પોલીસને એલર્ટ કરી દેવામાં આવી છે. ફરાર કેદીઓની ઓળખ કરવામાં મદદ માટે તેમની તસવીરો અધિકારીઓ વચ્ચે પ્રસારિત કરવામાં આવી છે. આ મામલે કેસ દાખલ કરીને તપાસ કરવામાં આવી રહી છે.

આ ઘટના પર ડીએમકે સાંસદ પી. વિલ્સને પણ રાજકીય પ્રતિક્રિયા આપી. તેમણે એક્સ પોસ્ટમાં આ ઘટનાને “શરમજનક” ગણાવતા રાજ્યમાં કાયદો અને વ્યવસ્થાની સ્થિતિને સંભાળવાની રીતની ટીકા કરી. વિલ્સને સી. જોસેફ વિજય પાસેથી રાજીનામું આપવાની માંગ કરતા કહ્યું કે, તેમને તમિલનાડુમાં કાયદો અને વ્યવસ્થાના કથિત રીતે કથળી જવાની નૈતિક જવાબદારી લેવી જોઈએ.

હિન્દુસ્થાન સમાચાર / ડૉ. વારા પ્રસાદ રાવ પીવી/ મુકુંદ

હિન્દુસ્થાન સમાચાર / ડો.હિતેશ એન.વ્યાસ