નવી દિલ્હી, 27 ઓક્ટોબર (હિ.સ.). લિક્ટેનસ્ટેઇનના કાર્યકારી રાષ્ટ્રાધ્યક્ષ પ્રિન્સ એલોઈસનું, રાષ્ટ્રપતિ ભવનમાં ઔપચારિક સ્વાગત કરવામાં આવ્યું. આ પ્રસંગે રાષ્ટ્રપતિ દ્રૌપદી મુર્મુ અને પ્રધાનમંત્રી નરેન્દ્ર મોદી હાજર રહ્યા.

હેરેડિટરી પ્રિન્સ એલોઈસ તેમના પત્ની પ્રિન્સેસ સોફી સાથે ભારતની મુલાકાતે છે. આ દરમિયાન તેમણે ભારતીય પ્રતિનિધિમંડળ સાથે મુલાકાત કરી, જ્યારે રાષ્ટ્રપતિ મુર્મુ અને પ્રધાનમંત્રી મોદીએ લિક્ટેનસ્ટેઇનના પ્રતિનિધિમંડળ સાથે મુલાકાત કરી.

ઔપચારિક સ્વાગત સમારોહ દરમિયાન રાષ્ટ્રપતિ મુર્મુ, પ્રધાનમંત્રી મોદી અને હેરેડિટરી પ્રિન્સ એલોઈસે રાષ્ટ્રપતિ ભવનમાં સંયુક્ત તસવીર પણ ખેંચાવી.

આ પછી ડૉ. એસ. જયશંકરે યુવરાજ એલોઈસ સાથે મુલાકાત કરી. તેમણે કહ્યું, “ભારત-યુરોપિયન મુક્ત વ્યાપાર સંઘ, 'વ્યાપાર અને આર્થિક ભાગીદારી કરાર'થી મળેલા અવસરોને કારણે, આપણા દ્વિપક્ષીય સંબંધોમાં ઘણા ક્ષેત્રોમાં ઘણી તેજી આવી રહી છે.”

ભારત અને લિક્ટેનસ્ટેઇન વચ્ચે દ્વિપક્ષીય સંબંધોને વધુ મજબૂત બનાવવાના ઉદ્દેશ્યથી, પ્રધાનમંત્રી મોદી અને યુવરાજ એલોઈસ વચ્ચે આજે દિલ્હીમાં એક ઉચ્ચસ્તરીય બેઠક યોજાશે. આ દ્વિપક્ષીય બેઠકમાં વ્યાપાર, રોકાણ, વિજ્ઞાન અને ટેકનોલોજી, નવીનતા તથા જનસાંખ્યિકીય સંબંધોને ગાઢ બનાવવા પર વિશેષ ધ્યાન આપવામાં આવશે. આ ઉપરાંત બંને નેતાઓ મુખ્ય વૈશ્વિક અને પ્રાદેશિક મુદ્દાઓ પર પણ વિચારોનું આદાનપ્રદાન કરશે.

યુવરાજ એલોઈસ આજે સાંજે જ રાષ્ટ્રપતિ મુર્મુ સાથે મુલાકાત કરશે, જ્યાં તેમના સન્માનમાં રાત્રિ ભોજનનું આયોજન કરવામાં આવ્યું છે.

યુવરાજ એલોઈસની આ વર્ષે આ બીજી ભારત યાત્રા છે. આ પહેલાં તેઓ ફેબ્રુઆરીમાં આયોજિત 'એઆઈ ઇમ્પેક્ટ સમિટ'માં ભાગ લેવા દિલ્હી આવ્યા હતા.

હિન્દુસ્થાન સમાચાર / શ્રદ્ધા દ્વિવેદી / મુકુંદ

હિન્દુસ્થાન સમાચાર / ડો.હિતેશ એન.વ્યાસ