કચ્છ, 04 ઓક્ટોબર (હિ.સ.) : માર્ગ સલામતીને પ્રાથમિકતા આપીને વાહનચાલકોમાં ટ્રાફિક નિયમો પ્રત્યે જાગૃતિ વધારવાના હેતુથી પ્રાદેશિક વાહન વ્યવહાર કચેરી, ભુજ-કચ્છ દ્વારા વિશેષ એન્ફોર્સમેન્ટ કામગીરી હાથ ધરવામાં આવી હતી. ‘સેવા મારું યોગદાન’ અભિયાન અંતર્ગત હાથ ધરાયેલી આ કાર્યવાહી દરમિયાન નિયમ વિરુદ્ધ વાહનો ચલાવતા વાહનચાલકો સામે મોટર વાહન અધિનિયમની જોગવાઈઓ મુજબ દંડાત્મક કાર્યવાહી કરવામાં આવી હતી.

વડાપ્રધાનના 25 વર્ષના સેવા અને સુશાસનના સંદર્ભમાં ચાલી રહેલી વિવિધ પ્રવૃત્તિઓના ભાગરૂપે ભુજ RTO દ્વારા માર્ગ સલામતીને કેન્દ્રમાં રાખીને વાહનોનું સઘન ચેકિંગ કરવામાં આવ્યું હતું. ખાસ કરીને વાહનોમાં નિયમ મુજબની હાઈ સિક્યોરિટી રજિસ્ટ્રેશન પ્લેટ (HSRP) લગાવવામાં આવી છે કે નહીં તેમજ વાહનોની કાચની બારીઓ પર નિયમ વિરુદ્ધ બ્લેક ફિલ્મ લગાવવામાં આવી છે કે કેમ તેની તપાસ કરવામાં આવી હતી.

ચેકિંગ દરમિયાન નિયમોનું પાલન નહીં કરતા વાહનો મળી આવતા RTOના ચેકિંગ અધિકારીઓ દ્વારા સંબંધિત વાહનચાલકો સામે ચલણ ઇશ્યૂ કરવામાં આવ્યા હતા. સમગ્ર કામગીરીમાં કુલ 86 વાહનો સામે દંડાત્મક કાર્યવાહી હાથ ધરવામાં આવી હોવાનું RTO કચેરી દ્વારા જણાવાયું છે. આ કાર્યવાહીનો મુખ્ય હેતુ માત્ર નિયમભંગ બદલ દંડ વસૂલવાનો નહીં પરંતુ વાહનચાલકોને ટ્રાફિક નિયમોનું પાલન કરવા માટે પ્રોત્સાહિત કરવાનો પણ રહ્યો હતો.

બ્લેક ફિલ્મ સહિતના નિયમવિરોધી ફેરફારો વાહન ચલાવતી વખતે દૃશ્યતા અને સલામતી સાથે સંકળાયેલા મુદ્દાઓ ઊભા કરી શકે છે. જ્યારે HSRP નંબર પ્લેટ વાહનની ઓળખ સંબંધિત મહત્વપૂર્ણ વ્યવસ્થાનો એક ભાગ છે. તેથી વાહનચાલકો પોતાના વાહનમાં નિયત નિયમોનું પાલન કરે તે અંગે અધિકારીઓ દ્વારા સમજ આપવામાં આવી હતી.

ચેકિંગ દરમિયાન RTOના અધિકારીઓએ વાહનચાલકોને નિયમ મુજબની HSRP નંબર પ્લેટ લગાવવા, વાહનોમાં લગાવેલી બ્લેક ફિલ્મ દૂર કરવા તેમજ રસ્તા પર વાહન ચલાવતી વખતે માર્ગ સલામતીના નિયમોનું પાલન કરવા અંગે જરૂરી માર્ગદર્શન આપ્યું હતું. RTOની આ કામગીરીથી વાહનચાલકોમાં નિયમોના પાલન અને સલામત વાહન વ્યવહાર અંગે જાગૃતિ લાવવાનો પ્રયાસ કરવામાં આવ્યો છે.

---------------

હિન્દુસ્થાન સમાચાર / Rohit Ramjibhai Padhiyar