- 500થી વધુ લોકોએ ઉત્સાહભેર ભાગ લીધો.

અમદાવાદ, 01 નવેમ્બર (હિ.સ.) : ભારતીય રમતગમત પ્રાધિકરણ (SAI), પ્રાદેશિક કેન્દ્ર ગાંધીનગર દ્વારા ફિટ ઇન્ડિયા મૂવમેન્ટ અને MY Bharatના સહયોગથી 1 નવેમ્બર 2026ના રોજ અમદાવાદના વીર સાવરકર સ્પોર્ટ્સ કોમ્પ્લેક્સ ખાતે ‘ફિટ ઇન્ડિયા – સન્ડેઝ ઑન સાયકલ’ની 97મી આવૃત્તિનું આયોજન કરવામાં આવ્યું હતું. રાષ્ટ્રીય એકતા દિવસની ઉજવણીના ભાગરૂપે યોજાયેલા આ કાર્યક્રમનો ઉદ્દેશ રાષ્ટ્રીય એકતા, શારીરિક તંદુરસ્તી, શિસ્ત અને પર્યાવરણ સંરક્ષણ અંગે જાગૃતિ ફેલાવવાનો હતો.

આ કાર્યક્રમમાં 500થી વધુ લોકોએ ઉત્સાહપૂર્વક ભાગ લીધો હતો. જેમાં ગુજરાતની વિવિધ NCC બટાલિયનો અને એકમોના કેડેટ્સ તથા જવાનો, સાઇકલિંગના શોખીનો અને નાગરિકો સામેલ થયા હતા. આ પહેલ દ્વારા સક્રિય જીવનશૈલી અપનાવવા, સામૂહિક સહભાગિતાને પ્રોત્સાહન આપવા અને સ્વસ્થ તથા સશક્ત રાષ્ટ્રના નિર્માણમાં દરેક નાગરિકની જવાબદારીને ઉજાગર કરવામાં આવી હતી.

આ પ્રસંગે સાહિલા સૈન્સન, સહાયક નિયામક, SAI પ્રાદેશિક કેન્દ્ર ગાંધીનગર ઉપસ્થિત રહ્યાં હતાં. કાર્યક્રમમાં 37 ગુજરાત બટાલિયન NCC, 1 ગુજરાત આર્ટિલરી બેટરી NCC, 9 ગુજરાત બટાલિયન NCC, 2 CTC, 1 નેવલ NCC, 2 એર સ્ક્વોડ્રન NCC, 1 ગુજરાત ગર્લ્સ બટાલિયન NCC, 1 ગુજરાત બોયઝ બટાલિયન NCC, 2 ગુજરાત કંપની ગાંધીનગર તથા 2 ઇન્ડિપેન્ડન્ટ NCC ગાંધીનગરના કેડેટ્સ અને જવાનોએ સક્રિય ભાગ લીધો હતો. તેમની સહભાગિતાએ દેશભક્તિ, શિસ્ત, ટીમવર્ક અને રાષ્ટ્રીય એકતાની ભાવનાને વધુ મજબૂત બનાવી હતી.

કાર્યક્રમ દરમિયાન વિવિધ NCC એકમોના અધિકારીઓ અને જવાનોને તેમની સક્રિય ભાગીદારી અને યોગદાન બદલ સન્માનિત કરવામાં આવ્યા હતા. સન્માનિત થનારાઓમાં 37 ગુજરાત બટાલિયન NCCના સુબેદાર ઇન્દ્રજીત; 1 ગુજરાત NCC આર્ટિલરીના નાયબ સુબેદાર અશોક ચવ્હાણ અને સુબેદાર કુલદીપ; 1 ગુજરાત ગર્લ્સ બટાલિયન NCCના સુબેદાર મોટુપ, હવાલદાર રઘુભાઈ અને નાયક રંજનેશ કુમાર; 9 ગુજરાત બટાલિયન NCCના હવાલદાર બિરેન્દ્ર સિંહ; 1 નેવલ NCCના શિશુપાલ સિંહ; 1 ગુજરાત CTCના એમ. બી. રાવ; 1 ગુજરાત બટાલિયન NCCના હવાલદાર મોહન સિંહ અને હવાલદાર અકરમ; તેમજ 2 ઇન્ડિપેન્ડન્ટ NCC ગાંધીનગરના હવાલદાર જયેશ કુમાર, નિકિતા (GCA) અને હવાલદાર વિપુલનો સમાવેશ થાય છે. આ સન્માન દ્વારા ફિટનેસ, શિસ્ત, રાષ્ટ્રીય એકતા અને સામાજિક સહભાગિતાને પ્રોત્સાહન આપવામાં તેમના યોગદાનની પ્રશંસા કરવામાં આવી હતી.

કાર્યક્રમની શરૂઆત ઉત્સાહભર્યા ઝુમ્બા સેશનથી કરવામાં આવી હતી. ત્યારબાદ ચેસ, ફૂસબોલ, લુડો, બેડમિન્ટન, વોલીબોલ સહિતની વિવિધ મનોરંજક અને રમતગમતની પ્રવૃત્તિઓનું આયોજન કરવામાં આવ્યું હતું. આ પ્રવૃત્તિઓ દ્વારા સહભાગીઓને ફિટનેસની સાથે મનોરંજન, પરસ્પર સંવાદ અને સામૂહિક સહભાગિતાનો અવસર મળ્યો હતો.

ફિટ ઇન્ડિયા મૂવમેન્ટની સતત પહેલના ભાગરૂપે કાર્યક્રમ સ્થળે વિશેષ ‘ફિટ ઇન્ડિયા ગેમ્સ ઝોન’ પણ બનાવવામાં આવ્યો હતો, જ્યાં સહભાગીઓએ પરંપરાગત ભારતીય રમતોમાં ઉત્સાહપૂર્વક ભાગ લીધો હતો. આ પહેલનો ઉદ્દેશ લોકોને ભારતની સમૃદ્ધ રમતગમતની વિરાસત સાથે ફરીથી જોડવાનો તેમજ શારીરિક સક્રિયતા, ટીમવર્ક, સંકલન અને સ્વસ્થ સ્પર્ધાત્મક ભાવનાને પ્રોત્સાહન આપવાનો હતો.

કાર્યક્રમ દરમિયાન BRICS સસ્ટેનેબલ લાઇફસ્ટાઇલ પ્રિસ્ક્રિપ્શન અંગે પણ જાગૃતિ ફેલાવવામાં આવી હતી. તેમાં સિંગલ-યુઝ પ્લાસ્ટિકનો ઉપયોગ ટાળવો, સ્વસ્થ જીવનશૈલી અપનાવવી, ઊર્જાની બચત કરવી, સ્થાનિક અને ટકાઉ ઉત્પાદનોને પ્રોત્સાહન આપવું, કચરો ઘટાડવો અને જવાબદારીપૂર્વક રિસાયક્લિંગ કરવું જેવા સંદેશાઓ આપવામાં આવ્યા હતા.

સાઇકલિંગ, મનોરંજક રમતો, પરંપરાગત ભારતીય રમતો, NCCની સહભાગિતા અને પર્યાવરણ જાગૃતિને એક મંચ પર લાવીને આ કાર્યક્રમ દ્વારા સ્વસ્થ, સ્વચ્છ અને ટકાઉ ભારતના નિર્માણમાં વ્યક્તિગત તથા સામૂહિક પ્રયાસોનું મહત્વ સમજાવવામાં આવ્યું હતું.

આ પ્રસંગે ફિટ ઇન્ડિયા મૂવમેન્ટના લોકપ્રિય સંદેશ “ફિટનેસ કા ડોઝ, આધા ઘંટા રોજ”ને પુનરાવર્તિત કરવામાં આવ્યો હતો અને નાગરિકોને દરરોજ ઓછામાં ઓછા 30 મિનિટ શારીરિક પ્રવૃત્તિ માટે ફાળવવા તથા ફિટનેસને પોતાની દૈનિક જીવનશૈલીનો અભિન્ન ભાગ બનાવવા પ્રેરિત કરવામાં આવ્યા હતા.

લોખંડી પુરુષ સરદાર વલ્લભભાઈ પટેલના રાષ્ટ્રીય એકતા અને સામૂહિક પ્રયાસના આદર્શોથી પ્રેરિત આ કાર્યક્રમ દ્વારા ફિટનેસ, પર્યાવરણ જાગૃતિ અને જવાબદાર નાગરિકત્વના મહત્વને ઉજાગર કરવામાં આવ્યું હતું.

ફિટ ઇન્ડિયા – સન્ડેઝ ઑન સાયકલ વિશે

કેન્દ્રીય યુવા કાર્યક્રમ અને રમતગમત મંત્રી ડૉ. મનસુખ માંડવિયા દ્વારા ડિસેમ્બર 2024માં શરૂ કરવામાં આવેલી ફિટ ઇન્ડિયા – સન્ડેઝ ઑન સાયકલ પહેલનું આયોજન યુવા કાર્યક્રમ અને રમતગમત મંત્રાલય (MYAS) હેઠળ ભારતીય રમતગમત પ્રાધિકરણ (SAI) દ્વારા કરવામાં આવે છે. આ પહેલમાં સાઇકલિંગ ફેડરેશન ઑફ ઇન્ડિયા (CFI), નવવ્રતિ ફાઉન્ડેશન, ફિટસ્પાયર, સેન્ટર ફોર ઇન્ટિગ્રેટિવ હેલ્થ, MY Bharat અને અન્ય ભાગીદાર સંસ્થાઓ સહયોગ આપે છે.

આ સાઇકલિંગ પહેલ દેશનાં તમામ રાજ્યો અને કેન્દ્રશાસિત પ્રદેશોમાં એકસાથે યોજવામાં આવે છે. આ અંતર્ગત SAIના પ્રાદેશિક કેન્દ્રો, નેશનલ સેન્ટર્સ ઑફ એક્સેલન્સ (NCOEs), SAI ટ્રેનિંગ સેન્ટર્સ (STCs), ખેલો ઇન્ડિયા સ્ટેટ સેન્ટર્સ ઑફ એક્સેલન્સ (KISCEs) અને ખેલો ઇન્ડિયા સેન્ટર્સ (KICs) દ્વારા પણ કાર્યક્રમો યોજવામાં આવે છે.

---------------

હિન્દુસ્થાન સમાચાર / અભિષેક બારડ