વડોદરા, 10 નવેમ્બર (હિ.સ.) : વડોદરા શહેરમાંથી પુરુષ ક્રિકેટ ટીમમાં ઘણા ક્રિકેટરો આપ્યા છે. હવે ગુજરાતના રમતગમત જગત માટે વધુ એક ગૌરવપૂર્ણ સમાચાર સામે આવ્યા છે. શહેરની જાણીતી આંતરરાષ્ટ્રીય મહિલા ક્રિકેટર યાસ્તિકા ભાટિયાની ભારતીય મહિલા ક્રિકેટ ટીમમાં આગામી દક્ષિણ આફ્રિકા પ્રવાસ માટે પસંદગી કરવામાં આવી છે.

પસંદગીકારો દ્વારા જાહેર કરાયેલી ટીમમાં યાસ્તિકાને ટેસ્ટ તેમજ વન-ડે બંને ફોર્મેટની સ્ક્વોડમાં સ્થાન આપવામાં આવ્યું છે. બંને ફોર્મેટમાં સમાવેશ થતાં યાસ્તિકાની ક્રિકેટ કારકિર્દીમાં વધુ એક સુવર્ણ સિદ્ધિનો ઉમેરો થયો છે.

આગામી દક્ષિણ આફ્રિકા પ્રવાસ ભારતીય મહિલા ક્રિકેટ ટીમ માટે ખૂબ જ મહત્વપૂર્ણ સાબિત થવાનો છે. આ પ્રવાસ દરમિયાન ટીમ ઇન્ડિયા ટેસ્ટ અને વન-ડે સીરીઝ રમશે. આ પ્રવાસની વિશેષતા એ છે કે ભારતીય ટીમનું નેતૃત્વ સ્ટાર બેટ્સમેન સ્મૃતિ મંધાના સંભાળી રહી છે.

સ્મૃતિ મંધાનાની આગેવાની હેઠળની આ મજબૂત ટીમમાં યાસ્તિકા ભાટિયા એક કુશળ વિકેટકીપર અને ભરોસાપાત્ર બેટ્સમેન તરીકે ટીમની મિડલ ઓર્ડર અને ટોપ ઓર્ડરની જવાબદારી સંભાળતી જોવા મળશે.

ડાબોડી બેટ્સમેન અને વિકેટકીપર તરીકે યાસ્તિકા ભાટિયાએ અગાઉ પણ અનેક આંતરરાષ્ટ્રીય મેચોમાં દબાણ વચ્ચે શાનદાર બેટિંગ કરીને પોતાની પ્રતિભા અને મેચ-વિનિંગ ક્ષમતાનો પરિચય કરાવ્યો છે. ઝડપી પીચો પર ટેકનિકલ બેટિંગ અને વિકેટની પાછળ વીજળી જેવી ચપળતાના કારણે પસંદગીકારોએ ફરી એકવાર તેના પર પૂર્ણ વિશ્વાસ વ્યક્ત કર્યો છે. ખાસ કરીને દક્ષિણ આફ્રિકાની બાઉન્સી વિકેટો પર યાસ્તિકાનો અનુભવ ભારતીય ટીમ માટે ખૂબ ઉપયોગી સાબિત થઈ શકે છે.

વડોદરાની આ હોનહાર દીકરીની રાષ્ટ્રીય ટીમમાં પસંદગી થતાં સ્થાનિક ખેલજગતમાં આનંદની લહેર ફેલાઈ ગઈ છે.

બરોડા ક્રિકેટ એસોસિએશન (BCA), સ્થાનિક કોચ, સાથી ખેલાડીઓ તેમજ ક્રિકેટપ્રેમીઓએ યાસ્તિકાને સોશિયલ મીડિયા અને રૂબરૂ મળીને અભિનંદન પાઠવ્યા છે. દક્ષિણ આફ્રિકાની ધરતી પર યાસ્તિકા પોતાની બેટિંગ અને વિકેટકીપિંગથી ભારતને વિજય અપાવે તેવી તમામ રમતપ્રેમીઓએ શુભેચ્છાઓ પાઠવી છે.

હિન્દુસ્થાન સમાચાર / હર્ષ શાહ