દિવાળી પૂર્વે જ શહેરમાં આગની શ્રેણીબદ્ધ ઘટનાઓ નોંધાઈ, તમામ સ્થળોએ સદનસીબે જાનહાનિ ટળી

રાજકોટ, 06 નવેમ્બર (હિ.સ.)

રાજકોટમાં દિવાળીના તહેવાર પૂર્વે જ આગ લાગવાની ઘટનાઓમાં સતત વધારો નોંધાઈ રહ્યો છે. ગુરુવારે સવારથી શુક્રવારે બપોર સુધીના ગણતરીના 15 કલાકના સમયગાળામાં શહેરના વિવિધ વિસ્તારોમાં આગ લાગવાના કુલ 10 બનાવો સામે આવ્યા છે. એકસાથે બનેલી આ ઘટનાઓને પગલે ફાયર વિભાગ હરકતમાં આવ્યું હતું અને વિવિધ સ્થળોએ દોડી જઈ કામગીરી હાથ ધરી હતી.

મળતી વિગતો મુજબ, શહેરના અલગ-અલગ વિસ્તારોમાંથી આગ લાગવાના કંટ્રોલ રૂમ પર કોલ મળ્યા હતા. ટૂંકા સમયગાળામાં જ એક પછી એક 10 સ્થળોએથી આગના અહેવાલો મળતા ફાયર બ્રિગેડના સ્ટાફમાં દોડધામ મચી ગઈ હતી. તહેવારના દિવસો નજીક હોવાથી આગના બનાવો વધતા તંત્ર દ્વારા પણ કટોકટી જેવી પરિસ્થિતિનો સામનો કરવો પડ્યો હતો.

આગના બનાવો અંગે માહિતી મળતાની સાથે જ ફાયર વિભાગની ટીમો તાત્કાલિક અલગ-અલગ ઘટનાસ્થળે પહોંચી ગઈ હતી. ફાયર ફાઈટરો દ્વારા સતત પાણીનો મારો ચલાવીને આગને વધુ પ્રસરતી અટકાવવાના પ્રયાસો કરવામાં આવ્યા હતા. ટૂંક સમયમાં જ તમામ 10 સ્થળો પર લાગેલી આગ પર સંપૂર્ણ કાબૂ મેળવી લેવાયો હતો. સદનસીબે આ તમામ બનાવોમાં મોટી હોનારત કે કોઈપણ પ્રકારની જાનહાનિ થવા પામી નથી.

દિવાળી પૂર્વે જ શહેરમાં આગ લાગવાની ઘટનાઓ વધતા ફાયર વિભાગ દ્વારા સાવચેતીના પગલાં વધુ સઘન બનાવી દેવાયા છે. આગામી તહેવારોને ધ્યાનમાં રાખીને, ફાયર ટીમોને વધુ સતર્ક અને સજ્જ રહેવાની સૂચના અપાઈ છે. હાલ તમામ સ્થળે સ્થિતિ નિયંત્રણ હેઠળ છે અને તંત્ર દ્વારા લોકોને પણ આગના બનાવો સામે પૂરતી કાળજી અને સાવચેતી રાખવા અપીલ કરાઈ છે.

હિન્દુસ્થાન સમાચાર / Dhaval Nilesh bhai bhatt