પાટણ, 27 ફેબ્રુઆરી (હિ.સ.) હોળી અને ધૂળેટીના તહેવારો નજીક આવતા સિદ્ધપુરના બજારો રંગીન બન્યા છે. પિચકારી અને રંગોના સ્ટોલ્સ પર ગ્રાહકોની અવરજવર વધી રહી છે. આ વર્ષે ઇલેક્ટ્રિક લાઇટવાળી પિચકારી, મલ્ટી ફુવારાવાળી ગન અને હર્બલ રંગોની નવી વેરાયટી બાળકો અને યુવાનોમાં ખાસ આકર્ષણ બની છે.

બજારમાં ₹30 થી ₹500થી વધુ કિંમતની 60થી વધુ પ્રકારની પિચકારીઓ ઉપલબ્ધ છે. વોટરગન, કાર્ટૂન ડિઝાઇન, એરગન અને ટેન્ક આકારની પિચકારીઓ બાળકોમાં વધુ લોકપ્રિય છે. રંગોમાં ₹10 થી ₹60 સુધી હર્બલ અને પાકા કલર સરળતાથી મળી રહ્યા છે, જેમાં હર્બલ ગુલાલનું ચલણ ધીમે ધીમે વધી રહ્યું છે.વેપારી રોહિતમનુભાઈ પટ્ટણીએ જણાવ્યું કે આ વર્ષે પિચકારીના ભાવમાં અંદાજે 20% વધારો થયો છે અને કેટલાક વેપારીઓએ ખરીદી ઓછી કરી છે. હાલમાં ઘરાકી સામાન્ય કરતાં ઓછી છે, છતાં વેપારીઓને તહેવાર નજીક આવતાં વેચાણ વધવાની આશા છે.

હિન્દુસ્થાન સમાચાર / હાર્દિક રાઠોડ