ભાવનગર, 27 ફેબ્રુઆરી (હિ.સ.) : ભાવનગર મહાનગરપાલિકાના કમિશનરએ આજરોજ શહેરના મહત્વપૂર્ણ માર્ગ પર ચાલી રહેલા વિકાસ કાર્યોની સ્થળ પર જઈ સમીક્ષા કરી હતી. દુઃખી શ્યામ સર્કલથી શિવાજી સર્કલ સુધીના રસ્તાના સુધારણા અને પુનઃનિર્માણના કામ અંગે વિગતવાર નિરીક્ષણ કરવામાં આવ્યું હતું. આ માર્ગ શહેરના વાહન વ્યવહાર માટે અત્યંત વ્યસ્ત અને મહત્વનો ગણાય છે, જેને ધ્યાનમાં રાખી ત્વરિત અને ગુણવત્તાસભર કામગીરી માટે અધિકારીઓને માર્ગદર્શન આપવામાં આવ્યું. મુલાકાત દરમિયાન કમિશનરએ માર્ગની પહોળાઈ, ડ્રેનેજ વ્યવસ્થા, ડિવાઈડર, સ્ટ્રીટ લાઈટ અને પગપાળા ચાલકો માટેની સુવિધાઓ અંગે ખાસ ધ્યાન આપ્યું હતું. રસ્તા પર થતી ટ્રાફિકની અવરજવર વચ્ચે કામ દરમિયાન નાગરિકોને ઓછામાં ઓછી અસુવિધા થાય તે માટે યોગ્ય ટ્રાફિક મેનેજમેન્ટ ગોઠવવા સૂચનાઓ આપવામાં આવી. સાથે જ કામમાં વપરાતી સામગ્રીની ગુણવત્તા જાળવવા અને સમયમર્યાદામાં કામગીરી પૂર્ણ કરવા સંબંધિત કડક નિર્દેશો આપ્યા.

વરસાદી ઋતુ પહેલા માર્ગનું કામ પૂર્ણ થાય તે માટે આયોજનબદ્ધ રીતે કાર્ય કરવાની સૂચના આપવામાં આવી. શહેરના સૌંદર્યવર્ધન સાથે સાથે માર્ગ સુરક્ષા પણ સુનિશ્ચિત થાય તે બાબતે ભાર મૂકવામાં આવ્યો.સ્થાનિક નાગરિકોએ પણ માર્ગના સુધારણા કામથી સંતોષ વ્યક્ત કર્યો હતો અને લાંબા ગાળે શહેરને લાભ થશે તેવી આશા વ્યક્ત કરી હતી. મહાનગરપાલિકા દ્વારા શહેરના વિવિધ વિસ્તારોમાં માર્ગ વિકાસના કાર્યો હાથ ધરવામાં આવી રહ્યા છે, જેના કારણે શહેરની મૂળભૂત સુવિધાઓમાં નોંધપાત્ર સુધારો થવાની અપેક્ષા વ્યક્ત કરવામાં આવી રહી છે.

---------------

હિન્દુસ્થાન સમાચાર / GONDALIYA DISHANT