વડોદરા, 27 ફેબ્રુઆરી (હિ.સ.) : પશ્ચિમ રેલવેના વાણિજ્ય વિભાગ દ્વારા વડોદરા મંડળમાં “સંવાદ” કાર્યક્રમનું સફળ આયોજન કરવામાં આવ્યું હતું. કાર્યક્રમની અધ્યક્ષતા પશ્ચિમ રેલવેના મુખ્ય પ્રધાન વાણિજ્ય પ્રબંધક તરુણ જૈને કરી હતી. આ પ્રસંગે મુખ્ય વાણિજ્ય પ્રબંધક (માલભાડું) જેરીન જી. આનંદ અને વડોદરા મંડળના વરિષ્ઠ મંડળ વાણિજ્ય પ્રબંધક નરેન્દ્ર કુમાર ઉપસ્થિત રહ્યા હતા. આ કાર્યક્રમમાં મુંબઈ, વડોદરા, રતલામ, અમદાવાદ, રાજકોટ અને ભાવનગર મંડળમાંથી આશરે 50થી વધુ ફીલ્ડ કર્મચારીઓએ ભાગ લીધો હતો. સંવાદ દરમિયાન કર્મચારીઓએ તેમના દૈનિક કાર્યોમાં આવતી મુશ્કેલીઓ રજૂ કરી તેમજ તેના વ્યવહારુ ઉકેલો પણ રજૂ કર્યા હતા.

કાર્યક્રમમાં ભવિષ્યમાં પાર્સલ અને માલભાડાની આવક વધારવા માટેના નવા સૂચનો પર પણ વિસ્તૃત ચર્ચા કરવામાં આવી. આ પહેલ ફીલ્ડ કર્મચારીઓ અને ઉચ્ચ પ્રબંધન વચ્ચે સારો સમન્વય સ્થાપિત કરવામાં મહત્વપૂર્ણ સાબિત થશે અને રેલવેની આવક વધારવાની દિશામાં એક સકારાત્મક પગલું ગણાશે.

---------------

હિન્દુસ્થાન સમાચાર / યજુવેન્દ્ર દુબે