નવસારી, 28 ફેબ્રુઆરી (હિ.સ.)-ભારતમાં મહિલાઓમાં સર્વાઇકલ કેન્સર ગંભીર આરોગ્ય સમસ્યા બની રહી છે અને કેન્સરના પ્રકારોમાં બીજા ક્રમે આવે છે. આ જીવલેણ રોગથી બચાવ માટે સરકાર દ્વારા 14 વર્ષની તમામ કિશોરીઓ (જેઓએ 14 વર્ષ પૂર્ણ કર્યા છે અને ૧૫માં વર્ષમાં પ્રવેશ કર્યો નથી)ને માર્ગદર્શિકા મુજબ HPV રસી આપવામાં આવશે.

નવસારી જિલ્લામાં આ અભિયાન આરોગ્ય વિભાગ, શિક્ષણ વિભાગ અને મહિલા-બાળ વિકાસ વિભાગના સંકલનથી સુચારૂ રીતે અમલમાં મૂકવામાં આવશે. જિલ્લાનાં પ્રાથમિક આરોગ્ય કેન્દ્રો, શહેરી આરોગ્ય કેન્દ્રો, સમુદાય આરોગ્ય કેન્દ્રો, સબ-ડિસ્ટ્રિક્ટ હોસ્પિટલો તેમજ જિલ્લા હોસ્પિટલ ખાતે રસી ઉપલબ્ધ રહેશે. ઉપરાંત શાળાઓ મારફતે પણ રસીકરણ કામગીરી હાથ ધરાશે.

જિલ્લા વહીવટીતંત્ર દ્વારા તમામ વાલીઓ, શિક્ષકો અને સમાજના આગેવાનોને આ મહત્વપૂર્ણ આરોગ્ય અભિયાનમાં સહભાગી બનવા અને 14 વર્ષની કિશોરીઓને HPV રસી અપાવી સુરક્ષિત બનાવવા સહકાર આપવા અપીલ કરવામાં આવી છે, એવી માહિતી મુખ્ય જિલ્લા આરોગ્ય અધિકારીએ અખબારી યાદીમાં આપી છે.

---------------

હિન્દુસ્થાન સમાચાર / યજુવેન્દ્ર દુબે