ભાવનગર, 28 માર્ચ (હિ.સ.) : મહુવા તાલુકાના મોટા ખુંટવડા ગામે ચૈત્ર સુદ નવમીના પવિત્ર અવસરે નવદુર્ગા મંદિરે ધાર્મિક અને આધ્યાત્મિક માહોલ વચ્ચે ભવ્ય કાર્યક્રમનું આયોજન કરવામાં આવ્યું હતું. આ પ્રસંગે ગામમાં ભક્તિભાવની વિશેષ લાગણી છવાઈ ગઈ હતી અને ભક્તજનો મોટી સંખ્યામાં ઉપસ્થિત રહી પૂજા-અર્ચનામાં જોડાયા હતા. નેપાલી બાપુ તથા ભારદ્વાજગીરી બાપુની પવિત્ર કર્મભૂમિ તરીકે જાણીતા આ સ્થળે શ્રી સિદ્ધ ગણેશ આશ્રમના ઉપક્રમે દુર્ગા સપ્તશતી સંપુટ પાઠનું વિશેષ આયોજન કરવામાં આવ્યું હતું. આ ધાર્મિક કાર્યક્રમ અંતર્ગત પૌરાણિક નવદુર્ગા મંદિરે 108 કન્યાઓનું ષોડશોપચાર વિધિથી પૂજન કરવામાં આવ્યું હતું, જે હિંદુ સંસ્કૃતિમાં વિશેષ મહત્વ ધરાવે છે.

આ પૂજન વિધિ ભારદ્વાજગીરી બાપુના વરદ હસ્તે શ્રદ્ધાપૂર્વક પૂર્ણ કરવામાં આવી હતી. કન્યાઓને દેવી સ્વરૂપ માનવામાં આવતી હોવાથી તેમની પૂજામાં ખાસ શ્રદ્ધા અને વિધિવત્ રીતરિવાજો અપનાવવામાં આવ્યા હતા. કાર્યક્રમ દરમિયાન તમામ કુમારીકાઓને ભોજન પ્રસાદ આપવામાં આવ્યો હતો તેમજ ભેટરૂપે પૂજા સામગ્રી અર્પણ કરવામાં આવી હતી. કાર્યક્રમનું સુચારુ સંચાલન હિતેશદાદા ભટ્ટ, સુરેશભાઈ દવે, ડૉ. પ્રવિણભાઈ યોગી, બહુચર મંડળ તથા સિદ્ધ ગણેશ આશ્રમના સેવકમંડળ દ્વારા કરવામાં આવ્યું હતું. સૌના સહયોગથી સમગ્ર કાર્યક્રમ ભવ્ય અને સફળ રહ્યો હતો. આ અવસરે ગામના આગેવાનો તેમજ ભક્તજનો મોટી સંખ્યામાં હાજર રહી માતાજીના જયકાર સાથે ભક્તિભાવ વ્યક્ત કર્યો હતો. આવા ધાર્મિક કાર્યક્રમો ગામમાં એકતા, સંસ્કાર અને આધ્યાત્મિક ચેતનાને મજબૂત બનાવે છે, તેવી ભાવના સાથે કાર્યક્રમ સફળતાપૂર્વક પૂર્ણ થયો હતો.

---------------

હિન્દુસ્થાન સમાચાર / GONDALIYA DISHANT