મહેસાણા, 11 એપ્રિલ (હિ.સ.) મહેસાણા જિલ્લા પંચાયત તથા તાલુકા પંચાયતની આવનારી ચૂંટણી કામગીરીને ધ્યાનમાં રાખીને નિયુક્ત કર્મચારીશ્રીઓ માટે તાલીમ કાર્યક્રમ સફળતાપૂર્વક યોજાયો હતો. આ તાલીમમાં ચૂંટણી પ્રક્રિયાને સુવ્યવસ્થિત, પારદર્શક અને નિષ્પક્ષ રીતે પૂર્ણ કરવા માટે જરૂરી માર્ગદર્શન આપવામાં આવ્યું હતું.

તાલીમ દરમિયાન અધિકારીઓ દ્વારા મતદાન પ્રક્રિયાના દરેક તબક્કા અંગે વિગતવાર સમજાવવામાં આવ્યું હતું. જેમાં મતદાન મથકની વ્યવસ્થા, ઈવીએમ અને વીવીપેટ મશીનોનો ઉપયોગ, મતદાર ઓળખ પ્રક્રિયા, તેમજ મતદાન દરમિયાન આવનારી વિવિધ પરિસ્થિતિઓને કેવી રીતે હલ કરવી તેની માહિતી આપવામાં આવી હતી.

કર્મચારીઓને તેમની ફરજ અને જવાબદારીઓ વિશે માહિતગાર કરવામાં આવ્યા હતા અને ચૂંટણી દરમિયાન કોઈપણ પ્રકારની ગડબડ ન થાય તે માટે ખાસ સૂચનાઓ આપવામાં આવી હતી. અધિકારીઓએ જણાવ્યું હતું કે, દરેક કર્મચારીની સજાગતા અને જવાબદારીપૂર્ણ કામગીરીથી જ ચૂંટણી સફળતાપૂર્વક પૂર્ણ થઈ શકે છે.

આ તાલીમ કાર્યક્રમમાં જિલ્લાના વિવિધ વિભાગોના અધિકારીઓ અને કર્મચારીઓ હાજર રહ્યા હતા. સમગ્ર કાર્યક્રમમાં ચૂંટણી પ્રત્યેની ગંભીરતા અને જવાબદારીનો ભાવ સ્પષ્ટપણે જોવા મળ્યો હતો.

---------------

હિન્દુસ્થાન સમાચાર / RINKU AMITKUMAR THAKOR