કચ્છ, 05 એપ્રિલ (હિ.સ.) : મુંદરા પોલીસ સ્ટેશનમાં નોંધાયેલા પ્રોહીબીશનના ગુનામાં લાંબા સમયથી નાસતા ફરતા આરોપીને લોકલ ક્રાઈમ બ્રાંચ (એલ.સી.બી.) પશ્ચિમ કચ્છ-ભુજ દ્વારા ઝડપી પાડવામાં આવ્યો છે. આ કાર્યવાહીથી પોલીસ વિભાગને મોટી સફળતા મળી છે અને ગુનાહિત પ્રવૃત્તિઓ સામે કડક સંદેશ ગયો છે.

મળતી માહિતી મુજબ, એલ.સી.બી. પશ્ચિમ કચ્છ-ભુજનો પોલીસ સ્ટાફ મુંદરા તાલુકા વિસ્તારમાં ફરાર આરોપીઓની શોધખોળ અને પેટ્રોલિંગ કામગીરીમાં વ્યસ્ત હતો. તે દરમ્યાન મોટી ખાખર ગામના બસ સ્ટેશન પાસે બાતમી મળી હતી કે મુંદરા પોલીસ સ્ટેશનમાં નોંધાયેલા પ્રોહીબીશન કેસમાં ફરાર રહેલો આરોપી પોતાની સુખપર ટીંબામાં આવેલી વાડી પર હાજર છે.

આ ચોક્કસ બાતમીના આધારે પોલીસ ટીમે તરત જ સ્થળ પર પહોંચી તપાસ હાથ ધરી હતી. તપાસ દરમિયાન આરોપી રઘુવીરસિંહ ઉર્ફે રઘુભા જીલુભા જાડેજા (ઉંમર ૩૪, રહે. નાની ખાખર, તા. માંડવી) મળી આવ્યો હતો. જે સામે મુંદરા પોલીસ સ્ટેશનમાં ગુ.ર.નં. ૧૬૯૯/૨૦૨૫ હેઠળ પ્રોહીબીશન એક્ટની વિવિધ કલમો હેઠળ ગુનો નોંધાયેલ હતો અને તે લાંબા સમયથી ફરાર હતો.

પોલીસે આરોપીને બી.એન.એસ.એસ. કલમ ૩૫(૧)(જે) મુજબ કાયદેસર રીતે અટકાયત કરી આગળની કાર્યવાહી માટે મુંદરા પોલીસ સ્ટેશનને સોંપ્યો છે.

આ સફળ કામગીરીથી પશ્ચિમ કચ્છમાં પોલીસની સતર્કતા અને કાર્યક્ષમતા ફરી એકવાર સાબિત થઈ છે. સાથે જ ગુનાહિત તત્વોને ચેતવણી આપવામાં આવી છે કે કાયદાથી ભાગી છૂટવું શક્ય નથી.

---------------

હિન્દુસ્થાન સમાચાર / Rohit R. Padhiyar