અમરેલી, 05 એપ્રિલ (હિ.સ.) : અમરેલી જિલ્લાના સાવરકુંડલા શહેરમાં શ્રીરામ ક્રિકેટ ટુર્નામેન્ટનો ભવ્ય પ્રારંભ ઉત્સાહભેર યોજાયો હતો. આ પ્રસંગે વિસ્તારના ધારાસભ્ય મહેશભાઈ કસવાળા તેમજ ભક્તિ બાપુની વિશેષ હાજરી રહી હતી. કાર્યક્રમની શરૂઆત પરંપરાગત રીતે કરવામાં આવી હતી, જેમાં મહેમાનો દ્વારા ખેલાડીઓને શુભેચ્છા પાઠવવામાં આવી હતી.

ટુર્નામેન્ટનો પ્રારંભ અનોખી રીતે કરવામાં આવ્યો હતો. ધારાસભ્ય મહેશભાઈ કસવાળા અને ભક્તિ બાપુએ પોતે મેદાનમાં ઉતરી બેટિંગ અને બોલિંગ કરીને રમતનો શુભારંભ કર્યો હતો. આ દ્રશ્યે ખેલાડીઓ અને દર્શકોમાં ખાસ ઉત્સાહ જગાવ્યો હતો. બંને આગેવાનોએ યુવાનોને રમતગમતમાં આગળ વધવા અને તંદુરસ્ત જીવનશૈલી અપનાવવા પ્રેરણા આપી હતી.

આ ટુર્નામેન્ટમાં તાલુકાના વિવિધ ગામોની ટીમો ભાગ લઈ રહી છે, જેનાથી ખેલકૂદ પ્રત્યેનો જુસ્સો વધુ વધશે. આયોજકો દ્વારા ઉત્તમ વ્યવસ્થાઓ કરવામાં આવી હતી અને મોટી સંખ્યામાં ક્રિકેટપ્રેમીઓ ઉપસ્થિત રહ્યા હતા.

આ કાર્યક્રમ માત્ર રમત સુધી મર્યાદિત નહીં રહી, પરંતુ સમાજમાં એકતા અને સકારાત્મકતા ફેલાવવાનો સંદેશ પણ આપ્યો હતો.

---------------

હિન્દુસ્થાન સમાચાર / Gondaliya Abhishek Nandrambhai